القبول يا رب - شباب الطريقة الختمية بدائرة ود ابراهيم بأم بدة
مجموعة مدائح ختمية.. شباب الطريقة الختمية بمسجد السيد علي الميرغني ببحري
|
|||||||
| المنتدى العام لقاء الأحبة في الله لمناقشة جميع المواضيع |
إهداءات ^^^ ترحيب ^^^ تهاني ^^^ تعازي ^^^ تعليقات ^^^ إعلانات |
|
 |
|
|
أدوات الموضوع | إبحث في الموضوع | انواع عرض الموضوع |
|
|
01-29-2014, 04:25 PM
|
#1 |
|
 
 |
جينا للبلد في إجازي
 جينا للبلد إجازي جينا للبلد إجازي …. والوكت داك انا المدرسة ما دخلتها شئ …. القطر وصلنا بى فليل نزلنا في كريمي مكندكين من عجاج القطر تحلف تقول كنا نتمردغ في الواطة دي وقمنا انا اصلي وشي ملخبت وملان سياييل بتل الحيطة النزلت فيها المطر وخرتت منها الجير … وكرعي ديل خلهن ساكت مجلبطات تقول عجنولن طين ولتخوهن بيهو … وشعري ده مشعنف بتل الليفة اللت العدة … أها قمنا نقلنا عفشنا فوق كارو نزوزي و نزوزي نامن وصلنا على البحر محل البنطون … لقينا الناس الصبقونا قاعدين كويمات كويمات … قالولنا البنطون خربان علا ترقدوا قبلكن ترجوا المراكب للصباح … فرشنا قبلنا في الرميلة ديك ورقدنا لامن الواطا اصبحت … على العلينا صحينا مكندكين زيادي الواحد فينا ان عجنوهو يبنوابو حيطة … وقمنا عدينا بالمراكب … والبحر دميري والموية عكراني ومغبشي بتل موية الزريعة … وكت مركبنا دقت في الحجرة لاقونا بطان واقفين في القيف بى فوق … وكت شافونا وعرفونا انطلقوا جري قدامنا شان يحدثوا اهلنا وياخدوا منهم البشارة … فعلا وصلنا لقينا الحوش الليلنا يسوي وا ضيقي … مطقوش لابو عينو بالحريم والرجال والشفع … واحدين لاقونا في الدرب شالوا مننا الشنط … دخلنا في الحوش والناس ديل جوا كابسيننا كلهن في وكت واحد دار يقالدونا .. بتل الشفع الختولن صحن فتة … والفرح الليل الدنيا ده كلو في وشياتن …ودميعاتن سايلي بالفرح .. تنزل فوق جضومن يلاقينها الشلوخ مبطحات بتل الجوبيل الليل اللقدابة يرجعنها لا وراء … يبكوا ويتنخجوا ونحنا نبكي ونتنخج وسدرنا يتهزا بتل العربية الماشي في الدقداق والشفع محقبين ايديهن يعاينوا للناس الجايين من فوق ديل …وانا لابس لي ساعة اللت بطان كانوا مشترينها لي … فرحان بها …الشفع يجوا يمسكوني من إيدي ويقيفوا قبلي ويعاينو لها ويقولوا … وي الليلي … شوفوا ده …لابس لو ساعة بتل الناس الكبار .. عليك الله ادني ياها اللشوفها وارجعها ليك …. وأنا أهز رويسي وازح منهن لا غادي … أها شلنا نفسنا وقعدنا …ضلعنا ديل بتل الكانن مردومات شنط اللات حديد من كترت القلدي والعصر…. فسراع فسراع سوولنا الشربات … وجروا العناقريب رصوهن بتل الباصات اللات كريمي … حبوبتي جات قعدت جنبنا وقالت :- انا لي تلات أيام عيني دي ترف بى فوق نامن ختيت لي فوقها عويشايي من كترت الرف … والكرجة من الصباح تجي ترك في النيمة دي وتبشر فوقنا وانا اقول يا ربي الجايينا منو … ؟يا ولادي جيداً جيتو وحمد الله على السلامي …. وبقت تكورك يا محمد …. يا محمد عليك الله اطلق العمبلوق داك من المراح فشان يلحق لنا الفطور ….. وانا قمت اجري على الكفاي الليل الجداد قبال يطلقوهو بقيت اتفرج في الديك ….. مدلدل علاعيلو بتل اللابس لو ملفحة واعاين لى ريشو ده بقى لي بتل اللابس لو قرمصيص … واضافرينو ديل بتل بصل المكادة المنضف اها وبجيكم صاد .. ونواصل .................. |
|
|
|
01-30-2014, 10:35 AM
|
#2 | |
|
شباب الميرغني
 
|
رد: جينا للبلد في إجازي
 هلا بي عودتك حبيبنا عبد العظيم...أنا خااااااااايف عليك من زرزرة ولاد البلد ليك... طبعاً زمان الناس البي يجُونا من الصعيد من لا فوق... نظرتنا ليهُنْ ميْتَانِييييييييييييييين وقاعْ ياكْلُو الباسطة والحليب!!! الحِيلُو فَتْرَان مننا كان يِسْتَعْرَضْ قُوَّتُو معاهُم في الصِرَاعْ الواحد ترمِيهُو تَجْ مِتْل المَنْقَايِي الوقَعَت في الواطَة التَرْيَانِي في إنتظارك يا عبدُو...
|
|
|
|
|
|
01-31-2014, 12:18 PM
|
#3 | |
|
المُراقب العام
|
رد: جينا للبلد في إجازي
الكاتب والقاص المخضرم عبد العظيم الطاهر سلامات....حمدلله بالسلامة بركة الوصلتو طيبين.. شكراً على القصة  سرد شيق جميل وممتع.. قصة سمحى بلحيل مجلبطة وملخبطة ومكندكة بالتراب و الطين والرملة شميت فيها ريحة البلد وريحة التمر ولون الخدار خاااااااانس لبد... .. خليتنى ضمة دال اقوم من دربى دا احصل قطر كريمى واسافر  ... الشى شوقتنى شوق شديد للبلد ولى الاهل الطيبين الحنينين ..هوي انا شاقية علا مابقدر انضم زي نضميك ده يا ود الطاهر... اها هسع نحن فى الانتظار واقفين جمب الكفاي الليل الجداد نتفرج معاك فى الديك العجيب ده عاد ما تطول الغيبة وتخلينا معلقين بين التريىّ ومجر الكبش .. تحياتى واحتراماتى وتقبل مرورى
|
|
|
|
|
|
02-02-2014, 04:31 PM
|
#4 |
|
شباب الميرغني
|
رد: جينا للبلد في إجازي
..هوي انا شاقية علا مابقدر انضم زي نضميك ده يا ود الطاهر... اها هسع نحن فى الانتظار واقفين جمب الكفاي الليل الجداد نتفرج معاك فى الديك العجيب ده عاد ما تطول الغيبة وتخلينا معلقين بين التريىّ ومجر الكبش .. تحياتى واحتراماتى وتقبل مرورى بت الخليفة.. أوعِك تكوني من شوايقة نيو جيرسي اليَفْتَحُو كلمة (الحِيبِي والكَركَتِّي) ويكِسْرُو كلمة السيدة والتَايَة؟؟ |
|
|
|
|
02-03-2014, 09:02 AM
|
#5 |
|
المُراقب العام
|
رد: جينا للبلد في إجازي
بت الخليفة.. أوعِك تكوني من شوايقة نيو جيرسي اليَفْتَحُو كلمة (الحِيبِي والكَركَتِّي) ويكِسْرُو كلمة السيدة والتَايَة؟؟ ابو الحسين اييي انا منهن بس مانى من شوايقت نيوجيرسى من شوايقت يوتا ايابا ..( الحيبى والكركتى) ديل شنن آآآآآآآآآولد وقعت ورا ستى مريم بت سيدى هاشم هسى دى ما ها رطانة عديل كدى ياربى تكون بالاسبانيش وانا ما عرفتها ؟؟ السيده والتايه معروفات لكن زي الكلام دى يطرشنى عند الجاينيز ما سمعتو ...  عاد الا نستعين بصاحبك ود الطاهر فشان يجى يعمليها ترانسليت هههههه .
|
|
|
|
|
| مواقع النشر (المفضلة) |
| كاتب الموضوع | عبد العظيم الطاهر | مشاركات | 4 | المشاهدات | 6412 |
|  |
| انشر الموضوع |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
العرض المتطور