|
من البشارات التايْهِي وسط المُنَفِّرَات (2)...
من البشارات التايْهِي وسط المُنَفِّرات (2)... أخوتي وأخواتي الكرام... السلام عليكم ورحمة الله وبركاته... نحن أُمة سيدنا محمد صلى الله عليه وآله وسلم (المرحُووووومة).. بُشِّرنا بالرحمة والخير العميم من اللطيف الخبير... بأننا خير أُمة... وأننا سندخُل دار النعيم ليس بكثير عمل أو مُضايَقة أو مُزَانَقة أو مُكَابَسة... شي بسييييييييييييييط يجعلنا في معية الحبيب المصطفى صلى الله عليه وآله وسلم... الحديث الجايي دا أخرجه الإمام أحمد والإمام أبو بكر البزَّار عن سيدنا أنس بن مالك "رضي الله عنهم أجمعين"... الصحابة كانُوا جالسين حول حبيبهم وسيدهم المصطفى صلى الله عليه وآله وسلم... قام قال ليهم... يجي داخل من الباب دا رجُل من أهل الجنة... الصحابة منتظرين جاء داخل راجل من أهل المدينة مااااااااهُو من الصحابة الكبار... بالبُكرية برضو قاعدين قال ليهم نفس البشارة... فجاء داخل نفس الرجل... وفي اليوم الثالث تكرر نفس المشهد... وجاء داخل نفس الرجل... اييييييييييييييهي... سيدنا عبد الله بن عمرو "رضي الله عنه"... قام مَرَق وراء الراجل دا... وقال ليهُو... أنا وابوي اتخاصمنا في حاجة كدي... وحالف علي ما أبيت في البيت تلاتة أيام... دحِين عاوزك تضيِّفني التلاتة يوم ديل... وسيدنا ابن عمرو طبعاً كضَّب الكضبة دي قصدو المعرفة... وعاوز يعرف الراجل البشروهُو بالجنة دا قاعد يسووي شنو في بيتُو... يعني صوَّام قوَّام الحاصل شنو؟؟؟ أها الراجل الطيب قال ليهُو مرحبابَك تَب التلاتة يوم دي تقعُدها معاي... أبشر بالخير... قام مشى معاهُو البيت وكانت المُفاجأة هناك... الراجل يصلِّي عشاهُو البدراني ويرقُد ينوووم ويشبَع نُوم ما يقوم تاني إلا لي صلاة الصُبح... ولمَّن ياخُدْلُو صَحْيَة بالليل كدي.. بس يذكر الله وتاني يرقُد... يعني زي لمَّن تجيك صحية بالليل ترفَع راسك تقول (لااااااااا إله إلا الله سيدنا محمد رسول الله... أو استغفر الله العظيم واتوب إليه... لا حول ولا قوَّة إلا بالله العلي العظيم)... وتاني يرقُد لا يقوم يتوضى يصلي ركعات ولا يُقيم الليل!!! لمَّن إنْقَضَت التلاتة أيام وسيدنا ابن عمرو بقى ماشي... جاء صارَح الرجل... وقال ليهو والله يا اخوي أنا ما كُنت مخاصم أبوي ولا شي... بس الحبيب المصطفى صلى الله عليه وآله وسلم بشَّرك بالجنة تلاتة مرات... فأنا قُلت أجي أشوفك قاعد تسوي شنو أكتر مننا عشان نسوِّي زيَّك... لقيتك تصلي عشاك وتنووووووووم... وبالنهار ما عندك صياماً زي غيرك... فيا اخُوي انت قصتك شني؟؟؟ الرجل كان صادق مع سيدنا ابن عمرو... قال ليهُو وحات الله غير الشي الشُفْتُو دا ما عندي شيتاً غيرُو... المُهم لمَّن سيدنا ابن عمرو بقى مارِقْ... الرجل إستدرَكْلُو شي وناداهُو... قالِّيهُو غايتُو أنا عندي شي قاعد اسوِّيهُو باللِّيل إحتمال يكون ياهُو الرفَع درجتِي للجنة دي... قالِّيهُو يلَّة ألحقني بيهُو أنا لي تلاتة أيام بي ليالِيهِن مراقب الشي دا وما عرفتُو... (قال ليهُو أنا لمَّن أجِي أرقُد باللِّيل للنوم... قاعِد أصفِّي قلبِي دا تَبْ ولا يكون فيهُو أيِّ ضغينة أو حقد على أي مُسلم)... بسْ؟؟ أيِّ بَسْ... شُوفُوا بالله عليكُم البشارة دي وعظمتها... نسأل الله أن يجعلنا من أصحاب القلوب الصافية وأن يُدخلنا في ذمرة الصادقين الصالحين... العافين عن الناس... الذابِّين عن أعراضهم لا الخائضين فيها... وصلى اللهم وبارك على سيدنا محمد وعلى آله الطيبين الطاهرين وصحبه المُجتبين... |
رد: من البشارات التايْهِي وسط المُنَفِّرَات (2)...
من المُبَشِّرَات التايْهِي وسط المُنفِّرَات (3)... نواصل أحبتي الكرام... بعد السلام عليكم ورحمة الله وبركاته... يروي سيدنا أنس بن مالك "رضي الله عنه" قال جاء رجل للحبيب المصطفى صلى الله عليه وآله وسلم... وقال ليهو... الرجُل يُحب الرجُل لكن ماب يقدر يعمل زي عَمَلُو؟؟؟ قال ليهُم قولة عظيمة خلاااااااااس وأحسبها من المُبشرات الغالية جداً... (المرءُ مع من أحَبَّ)... سيدنا أنس قال شنو؟؟... والله ما رأيت أصحاب رسول الله صلى الله عليه وآله وسلم فرحُولُن بي شي بعد إسْلامُنْ أكتر من المقُولَة دي... الحديث صحيح رواه الإمام أحمد بن حنبل "رضي الله عنه"... وفي روايةٍ أُخرى عن سيدنا أنس برضُو... قال أنا وسيدي النبي طالعين من المسجد لاقانا رجُل... قالُّو الساعة متين يا رسول الله؟؟؟ رد عليهُو الحبيب.. ماذا أعددت لها؟؟؟ الرجُل أخدْلِيهُو دِنقِيرَة كدي... وقالُّو والله يا رسول الله ما عندي صلاةً كتيري ولا صياماً كتير ولا صدقةً كتيري... بس إني أُحبَّ الله ورسوله... فقال له الحبيب المصطفى صلى الله عليه وآله وسلم: (أنتَ مَعَ مَنْ أحبَبْتَ)... الحديث صحيح رواه الإمام البخاري "رضي الله عنه"... نستفيد شنو من البشارات دي... محبَّة الأولياء والصالحين تُوردَك منازل المُتَّقين... نسأل الله أن يجعلنا من أحباب النبي وآل بيته الطيبين الطاهرين وصحبه المُجتبين وأوليائه الصالحين في الدنيا والآخرة... اللهم آمين... |
| الساعة الآن 10:34 AM |
Powered by vBulletin® Copyright ©2000 - 2025, Jelsoft Enterprises Ltd.
دعم وتطوير نواف كلك غلا