سماحة جمل الطين!!!
 

خارج النص
*سماحة جمَل الطين!!!*
جمال أحمد الحسن – الرياض 11 يوليو 2021م

زمان عندنا في البلد الزول السمح المسَبْسِب شعيراتُو وشاكِّي ليهُو بنطلون في نصُّو ومعلِّم الله من إسم فَرْطَاقَة في جيبُو، لي درجة سجايْرُو وصعُوطُو من (مَحْفَضَة) أُمُّو، وفُوق كدي البنات يِعايْنِلُّو بالرقاريق ويريدِنُّو.. النُوعية دي كان يقُولُولَهَا (سماحة جمَل الطِين)!!!
في الوقت الذي فيه المُعاناة تخنق البلد من أركانها الأربعة.. سياسية وإقتصادية وإجتماعية وأمنية.. جداد حمدُوك ونياق حميدتي في الفيسبُوك متشاكلين أسمَح زُولنا ولَّة زولكم؟؟؟
الجداد: زولنا بسمتُو برق العِشِي..
النياق: زولنا الراكِزْ عاد في المشي..
الجداد: زولنا (لُو) سارق (لُو) مُرتشي..
النياق: برضُو زولنا فوق راسْ زُولكُنْ (بالوااااااضح والمُفْتَشِي)!!!
وساعة الحكاية هاصت وبقى تقييم السياسي والأداء حقُّو بالبسمة الضواية والبدلة والكرافتة... دخل جماعة سير سير يا البشير على الخط.. قالُولُن سمحة الهيبة فوق أسد أفريقيا!!!
أما مجموعة (جِكْس حول الأصم) بالوسائط جااات حُوبتُن.. وأظهروا كمية من صُور الكاروهات لي زُولُن بعد ما أفَل نجمُو وضاعت أحلامُو بين سارقي ثورة الشباب العظيمة!!!!

*خارج النص:*
في واحدة من مجموعات (الإخِيدِر) المُدهشة.. جاء مقال منقول للخبير الإقتصادي الهادي هبَّاني بعنوان: (أكذوبة ال iban استمرار لحملة التضليل الممنهج).. أحد عطالة هذه المجموعة لا قرأ المقال ولا وعاهُو ولا عرف الفيهو.. طوالي قال دا (كُوز).. رد عليهُو أحد الساخرين.. (الكُوز) المكسَّر فُوق راسك القرعة دا!!! وواصل في الإنبراء والدحفسة لهذا المنسدِح على قفاهُو ومَسَمِّعِنُّو أي مقال ولة كتابة تنتقد السيد حمدوك بيه طوالي تصف صاحبها (بالكُوز).. كنُوع من الإرهاب المعنوي.. قال ليهُو: (الكُوز) ياهُو حمدوكَك دا.. الجابتُو لينا (الكُوزة) أميرة الفاضل من زُقاقات اسمرا.. وقال ليهُو خسَّمْتَك بي الله.. قَبُلْ يوم أميرة الفاضل ركَّبَتْنَا الماسُورة دي سمعت بالإسم دا قبُل كدي؟؟؟!!!
وختمها.. قال الهادي هبَّانِي كُوز قال!!! وغادر القروب.. وريَّح بالُو من نوعية الهندي عز الدين فرع حمدوك ديل!!!!!!
.
.
.
*ويظل سؤالنا الدائم.. البلد دي السايقها منووووووو؟؟؟*
*+ يا ربي صلاح منَّاع تمكَّن من قبض الدكتورة هبة الهاربة من عدالته ولَّة لسَّع؟؟؟*
*++ خبر الجماعة القبضوهم في مطار الخرطوم مهرِّبين (الذهب) برَّة شنو؟؟؟؟*
*وأخيراً.. بعد تعويم الجنيه منُو المتسبِّب في أزمة المواد الإستراتيجية يا جبريل؟؟!!!*