توثيق لشاعر من بلادي

[عمر بن عبد العزيز السقادي]

الأخوة الأعضاء بالمنتدي لكم التحية والتجلة والاحترام
أريد في هذه المساحة أن أوثق لأحد الشعراء المادحين والمحبين لحضرة الحبيب صلوات ربي وسلامه عليه وأهل بيته الكرام الأدباء النجباء وكان لهذا الخليفة الشاعر النصيب الأكبر في بناء مرقد العارف بالله تعالي الشيخ أحمد أبو شريعة رضي الله عنه فقد وقف عليه من بدايته حتي نهايته وهو الآن في انتظار أحد الأقمار المحمدية حتي يتشرف بهم الزمان والمكان بإفتتاح هذا الصرح الشامخ والذي يعتبر من تعظيم شعائر الله عزوجل والتي هي من تقوي القلوب وقد جاء هذا التوثيق بناء علي طلب مني فقد طلبت منه أن يعطيني مجموعة من القصائد كي أقوم بإنزالها بهذا السوح الطيب المبارك فوافق مشكوراً علي الفور وأحضر لي هذه المجموعة الطيبة منت القصائد المعبرة والتي نسأل الله عز وجل أن تحوز علي اعجابكم واليكم القصيدة الأولي من هذه المجموعة :

بسم الله الرحمن الرحيم
الإعانة بدءاً وختماً وصلي الله علي سيدنا محمد ذاتاً ووصفاً واسماً
المسبعة الميرغنية
الصلاة علي نبيه من حفيدو الميرغنية

بادي بالله العلية واهب الروح ليك ولي
باسط الخير والعطية السلام ليك والتحية

ربي عندي فيك نية قبل ما تجيني المنية
اشاهد النور السنية راحم الايتام ندية

بي ساكن الخضرة البنية ثنيت بي طه النبية
زاهدا كان الدنية ما اكل شيئا هنية

ثم الصلاة علي نبيه اقرؤوها يا بنية
في المسبعة الغنية من حفيدو الميرغنية

الختم بيها اتي سيدي عثمان انعت
مفتاح دخولنا يافتي للنبي الظل والغطا

هي مفتاح الدخول للاراد بيها الوصول
جايه في خمسة فصول بي اذن من الرسول

في مقدمة الكتاب جايى فضلها ياصحاب
الحديث ياهو الخطاب والدعاء بيها مجاب

سطر هذا الامام تقرا في السبعة أيام
في كل يوم يا سلام رابطنا بي سيد الانام

الصلاة علي الامين بادي بي ذاتو الضمين
وبي صحابتو الاولين الخلفاء والتابعين

والكمل ايضا عارفين وتابعى التابعين
الاولياء والصالحين والختم نور الجبين
هذي المسبعة يا فلا مليانة بي اعظم صلاة
من بداها واولا علي النبي خير الملا

سيدي عثمان في المساء بيت جو الكساء
بها زيل ربي الاسي احفظنا من كل وسوس

الختمية ذاتا مدرسة استاذ شيخي مدرس
فوق الطرق هي مريسة عند الرسول هي الكيسة

ربي بالنور الذكية وبالسور دي المكية
المراغنة اهل التكية بارك فيهم والذرية

بالنبي خير البرية زيل لنا هذه البلية
احفظ السادة الختمية آل البيت النبوية

الصلاة المضرية علي النبي خير البرية
الغالي بيها يكون ثرية وقدره فوق الثرية

[عمر بن عبد العزيز السقادي]

بسم الله الرحمن الرحيم
الإعانة بدءاً وختماً وصلي الله علي سيدنا محمد ذاتاً ووصفاً واسماً
القصيدة الشاملة
بمناسة زيارة الحسيب النسيب سيادة مولانا السيد/ محمد عثمان الميرغني الي مدينة شندي
مرحبتين حباب آل النبي العدنان حباب سيدي وسيد البلد عثمان
حباب رجل السلام الجابو بدري زمان الوطني الغيور علي عزة السودان
زاهد الدنيا والسلطة والسلطان بل همه الوطن وكرامة الانسان

هذي شندي جاتكم من جميع اجنابه طالبة الشرف دايره تزينو لها رحاب
يا النور البيقدح عز كدي ومهابة يا سليل الدوحة يا عظيم الشرف وانساب
شرفت البلد يا خير من وطئت تراب يا بضعة خيار الناس عجم واعرب
صاحب العمامة الليها الخلوق تتشابي وتيجان الملوك تعمل لها الف حساب

حبكم ياسيدي في رقابنا باقي امانة انتو سفينة النجا الراكب ضمنتو ضمانة
شندي تفتخر ارضا قبل سكانه بقدومكم يا حفيد مضر وكنانة
اصلها من قديم اتعل بيكم شانها حيث اتشرفت بي قدوم الختم عثمان

الاسلام في شندي قبيل منو الجابو غير ختم الرجال الجدو الرسول وصابو
اسالو مسجدو آل لليلة فاتح ابو ابو منارة عظيمة لي اهل الطريق واحبابو
بل فيهو بضعة شريفة من اصلابو السيدة ام كلثوم والحسن خلاصتي انسابو

شندي مدينة مهما قدمت ليكم مدينة يا من نشرتم في ربوعها الدين
مهما جدنا وقدمت ايدينا شن بتسوي شندي لي ام القري ومدينة

كان سيدي الختم فيها وسيدي راجل التاكا وهذا اليوم الاسد من ذاك
فالفضل لاهل الفضل هم اباك من اين ياتي الخير ان لم تجتلبه يداك
فهذه شندي مشتاقة تود لقاك كما خرجت المدينة قبل ذاك
ترجو مودة عمتوم آباك ورضا الله الذي هو عين رضاك
فاقول عنها وعنها جزاك الله خيرا وهو القادر علي جزاك

محطة ثانية
حديثي الجاي ده افردولو مساحه بخاطب كل سلاح او قريب في الساحة
نحنا كان دايرين لينا يبقي صباحا وبلدنا تعيش ابدا دوام في افراحا
فلنقول الاتي .. ولنعتبر انو الصحيح الصاح وصدقوني بلدنا يوت يشتعل مصباحا
انا داير اقول واقول بكل صراحة انبذوا الفرقة اتلموا تاني عجم وفصاح
انسو الماضي وانسوا كل جراح قدموا ابو هاشم نور النبي الوضاح
اخلصوا النية والتفوا حولو ابقوا رماح ما بتنكسر وتاني او تفرقكم أي رياح
خلو القافلة التسير وضموا كل جناح ما تهتموا تاني للكلاب ونباح
بي ستر الاله بي عيونا يا صلاح تجري السفينة ما سايقها نوح افهموا التلواح
ما دام ابو هاشم في البلد ما شين راح وما في طلقة تقوم تحصد ليها تاني ارواح
وطلاق غيرو هو لا في صلاح لا في فلاح .. لا في نجاح .. لا في رباح
كلا ولا في ملاح الحل في يدو هو وهو العنده المفتاح
والفاهم عكس .. انه لعمل بغير صلاح يلحق جنا نوح في اللجة راح راح

فيا سيدي يا عظيم الشان يا شيخ الطريقة يا ذا الدول عثمان
شندي بتقول لك بكل صدق وامانة البيعة يا عثمان ان او ان
شندي تبايعك وعزة ربنا ومولانا ما بتتزحزح شبر ان مرق شرار بركانة
تبايعك علي الاسلام بيعة رضا ورضوانة شريعة صحيحة بالسيف والكتاب فاحكمنا يا عثمان
ترفع لواء الاسلام وتجدد لنا الايمان بيك العزة والنصرة للسودان
امنت الوطن امنت كل سوداني وهذه حقيقة ما بختلفو فيها اثنان
فيا او كامبو ارجع شوف ليك بلدا تاني حقق فيهو مطامعك واقبض الاتمان
ما فيهو بصارو تب وطنا ده السودان بقدرة الاله حارسو ابن النبي العدنان
خيرنا وفير مخزونا بالاطنان يكفينا ويفيض وندي للجيران
فيا ربي ليك نتضرع نرفع الكفان بي جاه الامام عثمان عظيم الشان
حزب السيد يفوز في كل مكان الحزب الاصل المثبوت له العرفان
وتعود البركة بيهو من تاني تعم الشعب تدخل كل بيت سوداني
من نمولي جنوبا شمالنا لي اسوان ومن اقصي الغرب لشرقنا بورسودان
الصلاة والسلام تملا للاكوان لي شافع الامم يوم ينصب الميزان
بيها اهل الطريق والغالي والاخوان فوق جناح الختم عثمان عظيم الشان

الغالي عبد الله منصور – شندي – ساردية
مارس 2010م

[عمر بن عبد العزيز السقادي]

في هذه الصورة يظهر شاعرنا الخليفة الغالي مع مجموعة من الخلفاء في زيارة لمقام سيدي الشيخ أحمد أبو شريعة رضي الله عنه

http://img102.herosh.com/2011/11/21/459204836.jpg (http://www.herosh.com)

[سراج الدين احمد الحاج]

هي مفتاح الدخول للاراد بيها الوصول
جايه في خمسة فصول بي اذن من الرسول

في مقدمة الكتاب جايى فضلها ياصحاب
الحديث ياهو الخطاب والدعاء بيها مجاب

تسلم يداك ايها الاخ الحبيب الاستاذ/السقادى
فدوما تتحفنا بالدرر والروائع الجميلة
فهذه القصيدة لهذا الشاعر المحب الصادق تعتبر
ملخص لمقدمة المسبعة الميرغنية ..
فجزاءه الله عنا كل خير ووالله العظيم مثل
هذه القصائد فيها رفع للهمم وعدم التفريض
فى تلاوة هذه المسبعة العظيمة الشريفة المباركة والتى قال :

مؤلفها القطب الكامل والغوث الواصل شيخ الطريقة
وبحر الحقيقة السيد الشريف سيدى السيد /محمد عثمان الميرغنى من
ينتهى نسبه الى قرة كل عين سيدنا الشهيد الحسين بن السيدة فاطمة بنت
سيدنا رسول الله صلى الله عليه واله وسلم ..
( بشر النبى صلى الله عليه واله وسلم مؤلفها ان من لازم على قراءتها
يصير من اهل الفتح والكمال )
فيا اخوانى واخواتى ادعوا لنا ان يوفقنا الله جميعاً لملازمة تلاوتها
لان الملازمة عليها تحتاج لهمة الرجال الصادقين الذاكرين ..

لك منى صادق الود والتقدير ايها الحبيب الختمى الرائع دوما ..

[عمر بن عبد العزيز السقادي]

بسم الله الرحمن الرحيم
الإعانة بدءاً وختماً وصلي الله علي سيدنا محمد ذاتاً ووصفاً واسماً
السادة المراغنة
مرحبتين حباب آل النبي المختار السادة المراغنة أهل الكساء الأخيار
صافين عترة من قاموا هم صغار من نسل البتول أحفاد علي الكرار
بنص الكتاب الحق هم اطهار مذهب عنهم الرجس والاوزار
ديل حبهم مفروض علينا قرار فليبشر باغضهم مأواه هناك النار
من فرعهم ذاك الختم عثمان ناشر الدين حقيقة مكمل الايمان
الجاب الطريقة او راد كالبنيان واضع ليها اساس قامت به الاركان
جامع فيها كل الطرق بالوان في (نقشجم) افهم يالبيب عنوان
ادخل في الطريقة تجد معاك اخوان صادقين في حبهم اكثر من الاقران
ما بينهم رحم ولا دنيا فتانه سوي ودهم لطه في ابنه عثمان
وجوهم بيض بانوار الختم نديانة ثابت اجرهم عند الواحد الديان
يارب يا كريم تحفظ ذو الدول عثمان المن نسل الختم اتفرد عظيم الشأن
القائم بالامر فينا بالقران صاحب العمامة التخضع لها التيجان
عاد بالنصر والخير للسودان فرح بي الجميع من نملي لي اسوان
اللهم صلي علي جد الختم عثمان النبي العظيم الضو للاكوان
بعد ما يكون ايضا وما قد كان يلقي بها الغالي الرضا وجيرة العدنان

[عمر بن عبد العزيز السقادي]

بسم الله الرحمن الرحيم وبه
الاعانة بدءاً وختماً وصلي الله علي سيدنا محمد ذاتاً ووصفاً واسماً
المراغنه القاده


قول يا فمي ليهم بشكر السادة احفاد الرسول المراغنة القاده

يا اهل العقول صوتي لكم نادي فيما ياتي ذا قولي وانشاد
اصحوا الغفله لا تبقوا في عناد حب الرسول سووه لكم عاده
ودوا طه في آله الساده بضعة النبي المراغنة القاده
سفينة النجا للطالب اسعاد وخسرانا مبين للخالف وعاد
يلحق قوم ثمود يلحق لقوم عاد
ديل حبهم والله اكيد مطلوب يا جاهل بهم استغفر الله وتوب
فالجد هناك الميرغني المحجوب عبد الله ابي بكر فنعم ذا المحبوب
كل ميرغني لي نسله منسوب ديل اشرافنا فكن لهم محسوب
فرضا حبهم والله ما مندوب فنعم الكسب ذا ونعم ذا المكسوب
والباغض لهم ايمان طر مسلوب
مرحبتين حباب سيدي الختم عثمان شيخ الطريقه صمام لها وامان
منصور من الاله من النبي العدنان مأمور بتاليف المولد العثمان
الف كتبا ثقيله في الميزان في اجرها ما بيحصرو الملكان
سلسلة الميرغني بالكتب تزدان فيها الكثير كذا للمديح ديوان
فلنطلبها يا اخي ونخبر الحبان نلحق بالسفينة ونبقي لها ربان
والخالفها كر كر منه الاله غضبان
قول من نسلهم ذاك الحسن ذاك ابن الختم والساكن التاكا
معلوم بالعلوم المولي خصاك يا اب جلابية بالنور كساك
من قال ياحسن من قلبو ناداك تسرع لو الاجابه تقولو خذ هاك
قاصدين ياحسن طالبنه رضاك شئ لله يا حسن نحن في حماك
يا ابن الرسول العالي مثواك
قول منهم امامنا الاقرب لله دائما كان كان اقرب
والد السيد علي الوارث المشرب من فيض الحسن السريع يشرب
ارشد للطريقه ليها النفوس حبب كون للشباب البي الدفوف يضرب
بمدح المراغنه بيكم يمين نطرب قول يا سيدي قول مقبول لنا المطلب
في الدارين معانا تكون لنا اقرب
قول مرحب حباب واذكر لذاك الفرد ذو الدولي الامام البشر به الجد
معروف من نشا مرقوب فيه احمد نعم البايعوه لله قالوا الحمد
بالعون الالهي امر له ما رد كل مايبتغيه لابد يكون لابد
يا ابن الرسول من نزار ومعد بالسند الخفي ات للامامه معد
ياسيد السيادة ليك جددنا العهد ما بنتزحزح يمين كان السماء تنهد
تمم ياكريم لينا ذا المقصد في الحضرة نرقي للجنان نصعد
نبقي في الرحاب بالرسول نسعد

ندعوك يا من بصير وسميع احفظ للمراغنه وآلهم وجميع
من جاء منهم والفي الحجر لسع رضيع وجميع آل البيت والليهم ربي مطيع
بلغ سلامنا يوصل لهم سريع لساكن الطائف المعلا والبقيع
وكلا منهم قدرو عندي رفيع يوصل جدهم طه اللينا شفيع
يبقي لي ستر من النار صد منيع
يا ساداتنا سادة بني الانسان جاب عبدا ليكم فقير فلسان
فاعل الكبائر ما له احسان ناقص عمله يوت في خسران
واقف ببابكم طالب له استئذان ماله غيركم ياسيدي عثمان
يا باب الرجا الغالي جاك عدمان طالب لرضاك الفيه رضا الرحمن
قول ليه سعدت وفزت في الداران مع اهل الطريق وجملة الاخوان
والديك والاهل والاخله والخلان ومن شهد الشهاده قال مهما كان
كافه الامة تشمل لكل انسان
الصلاه مني ليك ما لها عدن تفوق الفي البحار الزاخرات حدن
وعد كل طرفة يطرف بها احدن ومثاقيل الجبال هي كذا احدن
عد الكائنات الحيه واللحدن وما في علم الواحد الاحدن
ليك يالرسول الما بشبهك احدن هداها الغالي ليك وللكريم شحدن
يعطيك المقام البيهو ليك وعدن

[عمر بن عبد العزيز السقادي]

بسم الله الرحمن الرحيم
الإعانة بدءاً وختماً وصلي الله علي سيدنا محمد ذاتاً ووصفاً واسماً

شوقـــي يا صحـــاب للختـــــــم خــــادم الجنــــاب الختــــــم
0000000000
بادي لــــي كتــــاب ياالختـــــــم افتــــح لـــي الباب يا الختــم
طالبــــــا ثــــواب يا الختـــــم يغطـــــي للحســاب يا الختـــم
0000000000
يا ابــــن الاصـــول يا الختـــــم جـــدك الرســــول يا الختـــم
بيك نرجو الوصــول يا الختـــــم بيك نرجـو القبــول يا الختـــم
0000000000
حــــارت العقــــول يا الختـــــم فـي الوصف والقـول يا الختـــم
لــو انظــم للحــول يا الختـــــم مــا ينصف القـــول يا الختـــم
0000000000
صفـــوة العـــدنـان يا الختـــــم نعمــــة المنـــــــان يا الختـــم
امــــن الســـــودان يا الختـــــم بــــي ولاد عثمـــان يا الختـــم
0000000000
سيـــد كـــل ولـــي يا الختـــــم منــك ذو الدولــــي يا الختـــم
انت كـــــل املــــي يا الختـــــم اكسنــــي الحــــلل يا الختـــم
0000000000
انتـــــم القـــــواد يا الختـــــم انتـــــم الاسيــــاد يا الختـــم
فيك لينـــا اسعـــاد يا الختـــــم علينا فضلك ســـــاد يا الختـــم
0000000000
جيتنـــــــا بالاوراد يا الختـــــم قلت فيــــها الــزاد يا الختـــم
ابــو هـــاشـم عــاد يا الختـــــم كيـــه لـــلاوغـــاد يا الختـــم
0000000000
انتــــــم القــــادة يا الختـــــم انتــــم الســـــادة يا الختـــم
خرقتـــــم العــادة يا الختـــــم فــي كـــل من عــاد يا الختـــم
0000000000
حبكــــم فـــــرض يا الختـــــم علينــا فـــي الارض يا الختـــم
جــانا زي قـــــرض يا الختـــــم ينجــــي يـوم عرض يا الختـــم
0000000000
الخليفـــة يتمنـــي يا الختـــــم الصحبة فـــي الجنة يا الختـــم
جعفـــــر اتهــــنا يا الختـــــم مــــع الشباب عنـي يا الختـــم
0000000000
الغالــــي جـاب نظم يا الختـــــم لـــي اولـــي العـزم يا الختـــم
قال لك ضيف اسمـي يا الختـــــم لـــي كاملــي الدسم يا الختـــم
0000000000
صلــي ربـــي كـــم يا الختـــــم كـــم وكـــم وكـــم يا الختـــم
مــا نطــق قال فــم يا الختـــــم علي النبي الاعظم يا الختـــم

[عمر بن عبد العزيز السقادي]

صورة للخليفة الشاعر الغالي عبدالله منصور ونحن في طريقنا للمشاركة والتهنئة في ذواج السيد عبد الله الميرغني المحجوب رضي الله عنه

http://img104.herosh.com/2011/11/21/811922485.jpg (http://www.herosh.com)

[عمر بن عبد العزيز السقادي]

هي مفتاح الدخول للاراد بيها الوصول
جايه في خمسة فصول بي اذن من الرسول

في مقدمة الكتاب جايى فضلها ياصحاب
الحديث ياهو الخطاب والدعاء بيها مجاب

تسلم يداك ايها الاخ الحبيب الاستاذ/السقادى
فدوما تتحفنا بالدرر والروائع الجميلة
فهذه القصيدة لهذا الشاعر المحب الصادق تعتبر
ملخص لمقدمة المسبعة الميرغنية ..
فجزاءه الله عنا كل خير ووالله العظيم مثل
هذه القصائد فيها رفع للهمم وعدم التفريض
فى تلاوة هذه المسبعة العظيمة الشريفة المباركة والتى قال :

مؤلفها القطب الكامل والغوث الواصل شيخ الطريقة
وبحر الحقيقة السيد الشريف سيدى السيد /محمد عثمان الميرغنى من
ينتهى نسبه الى قرة كل عين سيدنا الشهيد الحسين بن السيدة فاطمة بنت
سيدنا رسول الله صلى الله عليه واله وسلم ..
( بشر النبى صلى الله عليه واله وسلم مؤلفها ان من لازم على قراءتها
يصير من اهل الفتح والكمال )
فيا اخوانى واخواتى ادعوا لنا ان يوفقنا الله جميعاً لملازمة تلاوتها
لان الملازمة عليها تحتاج لهمة الرجال الصادقين الذاكرين ..

لك منى صادق الود والتقدير ايها الحبيب الختمى الرائع دوما ..

لك التحية يا خليفة والله تنورت هذه المشاركة بمروركم الطيب وكلماتكم المعبرة الصادقة ولا أفشي سرا ان قلت أن في كلماتك ومراسلاتك الطيبة رفع للهمم وتطييب للخاطر فنسأل الله لكم دوام الصحة والعافية في الدنيا والدين كما نسأله تعالي أن لا تنقطع طلعتكم البهية والتي لا تزال دوما رمانة هذا المنتدي وبهجته .

[عمر بن عبد العزيز السقادي]

بسم الله الرحمن الرحيم
وبه الإعانة بدءاً وختماً وصلي الله علي سيدنا محمد ذاتاً ووصفاً واسماً
سيد الناس
سيد الناس كيّس ياليله الميرغني يا اهل الكساء ياليله

الليل ربي ليلي مسا عاصي وقلبي قسا
زيل عني الاسي والحقني باهل الكساء
بثني القول في السطر بي الشقو لو الصدر
طه العالي القدر الفاق في نورو البدر
فوق عثمان انا بقول سيد ارباب العقول
باب الخير والوصول لي شافعنا الرسول
فوق سيدي الكلام وفوقو الجاب السلام
عظيما ساد العظام ومجمول فيهو النظام
عثمان البيهو النجا ومعروف يومو ال جاء
ياهو باب الرجاء البيهو الضيق يفرج
زيل ربي الفساد واجلي بيهو السواد
اصلح بيهو العباد والعدل يسود البلاد
فوقو يطول النظم وفوق الجدو الختم
كفاي للقول بختتم إن شاء الله مرادي اليتم

الليله الليله هوي يا ليله وفوق عثمان البشيل الشيله

الليله اليوم اليوم يوم عيد وبي عثمان سعادتي اكيد
عاش عثمان وعاش السيد وياهو الحق اليراهو سعيد
ليك بايعنا بي ارحامنا دنيا واخري انت امامنا
والياباك تدوسو اقدامنا ومهما يعز يهون قدامنا
ياك عثمان ياكا قمرنا وليك رفعنا كل امرنا
بالروح والدم فداك عمرنا وليك جاهزين بس انت امرنا
صلاتي عليك تفوق العدّ وتملا الكون مهما اتمدّ
بيها الغالي ينال الودّ ولي عثمان الامر لابدّ

[عمر بن عبد العزيز السقادي]

بسم الله الرحمن الرحيم وبه
الاعانة بدءاً وختماً وصلي الله علي سيدنا محمد ذاتاً ووصفاً واسماً
ياعثمان احمل الرايه
غير الوحدة مالنا غايه ياعثمان احمل الرايه
ياعثمان كفايه كفايـــــه غيث الامة احمل الرايــه في السودان سمعنا دعايـــه هي تقسيمو ولايه ولايـــه ياعثمان ادرك الامــــــــة انفصالنا لو كان تــــــــم
قتل الروح وسفك الـــدم بين الخال وبين العــــــم ياعثمان لم الشمـــــــــله
اكشف الغمه زيل الحمـــله تبقي جروحنا يوت مندملـه في الخيرات بلدنا يمـــــلا
ياعثمان انت لـــــــــيها ياابن البتول وابيهـــــــا انت الوحده ات حاميـهــــا حربا دايره تقوم اطفيهـــا ياعثمان أنت المــــرضـــي موضوع ليك قبول في الارض
خيار الوحدة يبقي فـرض نحفظ بيهو الدين والعرض ياعثمان رايك صائـــــــب جنبنا الفتن ومصائـــــــب رد الجيش الجاي كتائــــب شين وجيم يعيشوا حبائــب
ياعثمان قود النــــــاس ياابن النبي النـــــبراس ليك البيعه امر اساســـــي ياسيد الملوك تاج راســـــي ياعثمان جاتنا اخبـــــــار من سيدي الحسن سيد بـارا
غير ذو الدولي مافي دباره امحي الفتنة امحي غبـاره ياعثمان جينا نطايـــــــع مد الكف ليك نبايـــــــع هذا الشرع الاصبح ضائــع يبقي حقيقة ليس بضائــع
ياعثمان بيك نتباهـــــي يامن نارت بيهو جباهــــا الوالاك فروض اداهـــــــا
والعاداك النار يصلاهــــــا ياعثمان حزت الفخــــــر في الدنا بل في الاخـــــره
بي اسراراً فيك مدخــره يابحر البحور الزاخـــره صلاتي عليك تفوق العـــدّ تملأ الكون مهما اتمــــــدّ بيها الغالي ينال الــــــودّ وللسودان تتحقق وحــــده

[عمر بن عبد العزيز السقادي]

بسم الله الرحمن الرحيم
وبه الإعانة بدءاً وختماً وصلي الله علي سيدنا محمد ذاتاً ووصفاً واسماً
سيدى الإمام
سيدي الامام خاتم الكرام زمنو القادم

بي ربي العظيم ابدا قول نظيم فوق الاعظم
سيدي الكريم من سلاً رحيما فينا القائم

بثني بابي ابراهيم اول في العزيمة وابن القاسم
سيدي موسي الكليم وسعدية الحليمة سوحوايمو

عثمان الطولو قام بدراً في الظلام كفو ارحم
صاحب العمامة قائد الكرام هو اكرم

سيدي النور بارق فوق الكون شارق فاق الانجم
قول للقلب فارق من الملة مارق احذر ترجم

سيدي امرو خارق بي نيرانو حارق قول للاجرم
الفي اللهو غارق ليهو الروح تفارق حالا اعدم

بي السودان سلام من حرب وسهام بيهو اتقدم
بيهو نلقي المرام كل من ليهو رام ينجي ويسلم

يمسك الزمام يقضي النظام يبقي الحاكم
يحكم بالاسلام بيهو العدل قام هو القائم

يرحم اليتامي ويسعد الايامي في العالم
بي عد الايام نفرح يوت دوام وربي العالم

يسود العدل طراً يبقي العبد حراً زي الأول
يحلو الكان مراً والخيرات يدرن هو الاجمل

في يوم القيامة الناس في زحام جانا القاسم
قدم للامام النار ام حمام منها عاصم

نسعد نحن ثاني بي سيدي عثمان نبقي في رضا
نحسب للثوان ونتمناه ثاني عمرنا الكان مضي

صلاتي عد ماك لي سيدي الرآك تملا للفضاء
داير لي رضاك قول للغالي هاك امرك انقضي

[عمر بن عبد العزيز السقادي]

بسم الله الرحمن الرحيم
الإعانة بدءاً وختماً وصلي الله علي سيدنا محمد ذاتاً ووصفاً واسماً
سلام سلام
سلام سلام عليكم كثير خذونا اليكم فنعم المسير

السادة المراغنه بكم نستجير آل بيت رسولنا جابر الكسير
الصلاة عليكم في تاج التفاسير فرض وايضا عند ابن كثير

اليكم اليكم يجب ان نسير بحق الموده وما قد يصير
معاكم معاكم يزول العسير معاكم معاكم ننجو من ام سعير

انتم بقية الراجي النصير انتم كنز للعاقل البصير
حبكم فخر يطول به القصير في الحشر معاكم فنعم المصير

انتم خير هذي الارض اصل للسنة كما للفرض
انتم ذات حبيبي وبعض فواجب علينا عليكم نعض

الا فانظروا لعبد ضعيف الا فاجعلوا قلب نظيف
الا فاوقفوا الحرب والنزيف في دار فور القري والريف

سيدي يا سيدي يا سيدي عثمان انت سلطان هذا الزمان
الا فادرك انقذ السودان من حروب وفتن . فتن امريكان

الفوز كل في حبكم الويل الويل لمن سبكم
صلي وسلم عليكم ربكم كذا الكل ومن يلوذ بكم

صلي ربي علي اصلكم طه الشفيع الرسول حبكم
بعد ما يصلي ومن حبكم الغالي يكون محبوبا عندكم

[عمر بن عبد العزيز السقادي]

بسم الله الرحمن الرحيم وبه
الاعانه بدءاً وختماً وصلي الله علي سيدنا محمد ذاتاً ووصفاً واسماً
قصيدة في رثاء الخليفة جعفر الأمين عمر
خليفة الخلفاء بمدينة شندي وضواحيها


أقول في هذى اللحظة لا بدّ من وقفه في حق خليفه الخلفاء قائد الدفّه
ضيوف شندي غير جعفر حرّم ما بتتكفي يتب حفيان يجري على الضيوف بلهفه
بابو فاتح ما سدّ لو يوم ضلفه وما رد لو سائل حتى كان جابتو الصدفه
الظاهر كثير وهناك ما اخفى حتى ناس الكورة نالوا وكان حظهم اوفى
للطريقه هو ساس وحرفها الألف ومنزلة الكرام آل النبي الشرفاء
إن داير تعرفو ادخل لو في الديوان تسمع حرّم وباقي كلامو شيّه صواني
اكرامو عام لي عامة بني الإنسان ما خصابو ذو جاه أو ذوي سلطان
واصلاً إكرام الضيف من خالص الإيمان لهذا السبب يكرم لا لشيئٍ ثاني
اصلك بيت كرم قائم الاركان يامقصود الرجال والفي الوحل دركان
كم اكرمت كم احسنت في انسان كم اصلحت كم فكيت رقبة الجاني
كم طايبت كم باشرت من اخوان ولي اهل الطريق الامر عندك ثاني
كم كم كثيره مايحصرها أي لسان يكفيها الفخر يوم شيع الجثمان
فقدك يا الخليفة جلل لكل انسان و عشمانين في العقب يولوا لنا جعفر ثاني
ابشر يا الخليفة فقد ثبت لك العرفان الدنيا قليله او كثيره اصلو رائح وفاني
فيا ربى ليك نتضرع نرفع الكفان بي جاه الإمام عثمان عظيم الشأن
خليفتنا جعفر يرقى أعلى جنان وكل الأسرة الكريمة المقرية الضيفان
الصلاة والسلام تملأ للاكوان لي شافع الأمم يوم ينصب الميزان
بيها اهل الطريق والغالي والاخوان فوق جناح الختم عثمان عظيم الشان



الغالي عبد الله منصور
شندي / الشقالوة ساردية
مارس2011م

[عمر بن عبد العزيز السقادي]

بسم الله الرحمن الرحيم
الإعانة بدءاً وختماً وصلي الله علي سيدنا محمد ذاتاً ووصفاً واسماً
هذه القصيدة هي مدح للشيخ البرعي وقد جاء تفاعلاً مع أحد مريديه حينما جاء مشتكياً للخليفة الغالي عن بعض الكارهين الذين سبوا الشيخ البرعي رضي الله عنه فقال الخليفة هذه القصيدة ردا علي كذبهم وافتراءهم ودعاويم المقيتة :


http://img102.herosh.com/2011/11/21/196238334.jpg (http://www.herosh.com)

(البرعي منكم براءة)

البرعي منكم براءة
البرعي منكم براءه
يا من قلتم فيه افتراء
خافوا الله يوم الجزاء
ربي سامع النداء
احفظنا من كل داء
اجب لينا الدعاء
من كبر وإدعاء

بثي القول باعتناء
بالمصطفي الزال العناء
البرعي يجد الهناء
بى مدح النبي وثناء
البرعي كان قامه
في نفوسنا ليه مقام
العادوك ديل لئام
حسابهم يوم القيامه
البرعي كان أمَّه
والقوم ليهم أمَّ
حاز الخبر ليه لمّ
مدح النبي مسدار وتمَّ
البرعي للخير غارس
كم بنى للدين مدارس
الزريبه وكم فيها دارس
كم ذاكر وللعلم جالس

البرعي افضالو عديده
كم ارشد زوج مريد
كم نفوس كانت عنيده
اصلح فساد صحح عقيده
يا من قلتم افتراء
دون علم او قراءه
البرعي منكم براءه
يا زبد السيل وغثاء
دينا السمح دا غزوه
بالفكر السام اذوه
هن قائلين انقذوه
وعادوا الولي و نبّذوه
ديل جاهلين بالحقائق
ما بعرفوا الرقائق
جو للدين في دقائق
عكسوا الفهم وضعوا العوائق
البرعي نورا اضاء
ملأ لي السودان فضاء
المولي عنه في رضاء
وارجو حسابو انتم وقضاء
البرعي دا ابتلاء
كما كان للانبياء
ليك ندين بالولاء
ونعادى القال ليك لاء
البرعي ليس عادي
قدرو بنعرف بيغادي
يا من ليهو تعادي
ارجع توب قبل المعاد
البرعي نم هنيئا
في الفردوس في نعيما
العادوك في جحيما
شرابهم من حميما
للمصطفي طه النبيه
صلوات اضعاف الميه
الغالي يكون سويا
مع البرعي في المعيه

[عمر بن عبد العزيز السقادي]

وهذه القصيدة للشيخ عبدالرحيم البرعي رضي الله عنه وأرضاه للمناسبة وجمال القصيدة وتعابيرها الجميلة ننزلها في هذه المشاركة

لى مهجة فيه نار الحب تشويها ** لهيبها زاد منه الجسم تشويها

وبتّ فى غمرة ارعى الخيال على ** سهو وانى رهين خالد فيها

آه على ساعة مرت علىّ ولم ** اسعد برؤية نور الارض محييها

آه على خطرة فى القلب قد خطرت ** ولم يكن ذكر محبوبى يوافيها

ولو راى حسنه طرفى على قدر ** لتهت فى فرح من حبه تيها

رؤياه فى عالم الرؤيا بها سعدت ** روحى وخير من الدنيا وما فيها

هو الذى رفع المولى مكانته ** فوق العلا هل ترى شيئا يضاهيها

محمد خير خلق الله قاطبة ** به الملائكة المولى يباهيها

وأكرم الرسل كلّا وهو أعظمها ** شأنا ومن حوضه المورود ساقيها

ضاءت بميلاده البطحاء وازدهرت ** به تصابحها البشرى تماسيها

حليمة سعدت حين الرضاع به ** وللسعادة اوقات توافيها

سارت وهى خلف المرضعات على ** عجفاء تمشى رويدا فى تقفيها

فسارعت تتخطّاهنّ سابقة ** أتانها وهى بالفيحاء تطويها

وبوركت برسول الله عيشتها ** وابتلّ يابسها واخضرّ واديها

تعلّقت ان مشى فى البرّ منفردا ** بذيله الوحش كلّ فى مراعيها

والضبّ كلّمه والغيم ظلّله ** والسحب قد هطلت سبعا غواديها

ذو عزّة لم تزل بالله دائمة ** جلّت مكانتها عزّت مراقيها

وقد اتانا بآيات مفصّلة قد ** حارت الفصحا من قومه فيها

لاريب فيها هدى للمؤمنين بها ** لاباطل من جهات الشك يأتيها

انّ القضاء وتدبير الامور بها ** كم وجّهت حائرا لله توجيها

بها النجاة من الاهوال ان تليت ** لعلّة فى صدور الناس تشفيها

وفسّرتها بأمر الله سنته ** وبيّنت لجميع الناس خافيها

ومن حكيم عليم انزلت عجبا ** بذكره نوّهت فى الكون تنويها

سلها ايا ذا النهى عن كل مسألة ** كذاك عن نية فى القلب تنويها

ونبّهتنا على تعزيزه وعلى ** توقيره وعلى التعظيم تنبيها

انّ الذى فرض القران ارسله ** بالحق للامة الوسطى يزكيها

الى النجاة والى التوحيد قائدها ** الى السلام الى الرحمن داعيها

الى التى هى عند الله احسن ** قد اضحى بما جاء فى القرآن يهديها

بالحق والصبر والمعروف يامرها ** عن المناكر والعصيان ناهيها

وقام للملّة السمحاء منتصرا ** والى احبّتها عادى معاديها

ياسيدى يارسول المستعان ** ومن وجوهنا نحوه كلّا نولّيها

انظر لعبد الرحيم البرعى انّ له ** نفسا تتوق الى أعلا امانيها

عليك صلّى اله العرش خالقنا ** يامن اتى رحمة جلّت معانيها

والآل والصحب ما البرعى قال لكم ** لى مهجة فيه نار الحب تشويها

[عمر بن عبد العزيز السقادي]

بسم الله الرحمن الرحيم
وبه الاعانه بدءاً وختماً وصلي الله علي سيدنا محمد ذاتاً ووصفاً واسما
فى رثاء الخليفة جعفر الامين عمر

للخليفة بهدى القول ********* جعفر رضى عنه المولى



نبرأ مــــن ذا القول
لاقوة ليــنا لاحول
لى ربى العزيز المولى
القوة يوت والحول
احمـــد شافع يوم الهول
ثنيت بصادق القول
ارسى الدين ارسى الدولة
بى نفوسنا مننا اولى
لابد وانى واقــــف
فى مثل هذى مواقف
فجعفــــر ظلا وارف
الجـرح لا زال نازف
وجوفــــو كان احر
كـــان اصيلا حرّ
يخدم مابيهمو الحر
يتب حفيان لى برّ
لى البيقبل غادى
بى حرم كان ينادى
يتفقد البيغادى
وهو رايح وغــادى
للضعيف والكان اقوى
بيتو كـــــان ماوى
لا لسمعه لا قول سوى
كرمو كان عن تقوى
مهما كان صحيح او سقيم
الخليفة يباشر ديمه
عند الكان قلبــو رحيم
حتى الطفل عنده قيمه
فى كل الامور قدامو
الخليفة كان مقدامو
الخليفــة يبقّو إمامو
فالصلح من له رامو
عند اهالى البلده
محبوباًَ كان ذو ودّ
فكاها مـــن الحدّ
كم رقابا عـــدة
على اولاده قدمها
الطريقة هو خدمها
جعفر بيرق وعلمها
من الراية هو استلمها
نعاك مربع سبعـــه
فى اليله الكانت سبعه
وطفت الجنان السبعه
رقيت بى فوق للسبعه
مالتفت لــــوراه
رغم كل اغراه
حقا دون أي رياءُ
يفعل كل مايراه
غير عثمان ما آلفت
قسم على حلفت
للبي غير علم افتى
تشييعك كان استفتاء
وكل من ليهم أعان
ربى اهدى اعدانا
ومعروف خلق مولانا
الطريقة هى وعانا
ليك رفعنــــــــا يدانا
ربى هذا دعانا
عند سيدى الختم عثمانا
بجعفر يبقى لقانا
فالخليفه فضله يعجز
كفاك لسانى اوجز
ويهون لو كل المعجـز
للخير وصنوف ينجز
بجاه النبى المرسول
ياربى اجب السؤل
جعفر فرعو واصول
فردوس تبقى نزول
فى آل جعفر الاصول
فالحبل يكون موصول
اليقودنا معاه نصول
ربى تم لى وصول
عد الكتب عـــد دراس
صليت للنبى النبراس
تبقى التقوى ليه لباس
الغالى تصلح ساس
يوم الزول يمرق الداسو
يوم الشدة يوم البأس
يجيز الصراط بى ناسو
الخليفة يرفع راسو

[عمر بن عبد العزيز السقادي]

هذه بداية لهذا التوثيق المستمر إن شاء الله وبداية الغيث قطرة ثم ينسكب .

[أبو الحُسين]

ندعوك يا من بصير وسميع احفظ للمراغنه وآلهم وجميع
من جاء منهم والفي الحجر لسع رضيع وجميع آل البيت والليهم ربي مطيع


اللهم آمين... شكراً جميلاً أُستاذنا السقادي على هذا التوثيق الطيب لشاعرنا الغالي من ساردية...

واصل يا الحبيب فهل من مزيد؟؟