الشاعر الدكتور ودبادى يمدح رئيسنا حاتم بدرر الكلام

[تاج السرفوزى]

مربعـات للديموقراطيـة الرابعـة

للشاعر الاتحادي .. اصيل

سموك حاتم علي رمز الكرم والجود
وأبوك السر خليفة الفي الحرم مشهود
أقدل في المحاص بجناحك المفرود
وما أظن الرخم ياكل معاك.. يالدود
............
سموك حاتم.. في شان نصرك اكيد ومحتم
وتاريخك مجرتق بالدما.. ومختم
بلدنا اتيتمت.. ليلا المكوزن عتم
واياك مرواد عماها.. واياك بدر التم
...........
الباشاب جدودك والولي الباسبار
حلق في السما ولا يهمك الباجبار
خوجل في المحاص بي توبك الجرجار
سيد ملكا قديم.. حاتم بجيب التار
............


البتقولا بتسويها.. ما بتهدد
ما بتضل.. معاك ابو هاشم المتحدد
السودان بحر خيرو الكتير متجدد
وشايفك من بعيد زي ابكريق متمدد
............
حزب الاتحادي الاصلي اصلو مركن
خيلو مأصلة وزي الصقور اتفكن
ناس المؤتمر في اللفه خيلن جكن
ومتحول كبيرن في الحداره مجكن
.............
ديل عشرين تماما ونحن مخنوقين
وديل عشرين عجافا ونحن مسروقين
المال مو فزع ما بكاتلو ملكوزين
افطر بالكبير.. واتغدي بالكوزين
..............
يمين الاتحادي الاصلي.. مو متندم
يقطع من حشاهو ويرقع المتهدم
نحن ان عشنا بنجود بي سخا ونقدم
وان كوعنا.. فوق عزا قديم متردم
.........

يالانقاذ مصيبتك انتي من فتحت
اتلجيتي بالرشوات ومال السحت
بعد ماشبعت من ثدي الحرام ونتحت
بقيتي ملايكة يالانقاذ.. وجيتي نصحت
............
كل ما إنشق واحد راسو فيهو شقيقة
تهزَبو إنت لكن مابفكلو ضيقة
لميت التمور النية والدفيقة
معا تمر الهبوب المابفكلو ريقه
.............
وين مايو..ووين اب عاج.. وين عبود
ثورات بالكضب.. والصح مصيرو يعود
يالانقاذ شدرتك باقي فيها العود
اختمي بالشهادة.. ووحدي المعبود
.............
دا حال المؤتمرجية الجيوبه ملانه
قالو بسيطة.. نرشي فلان وندَي فلانه
قايلين بشتروهم بالفلوس والهانه
ما بياكلو الحرام لو يسكنو الجبانه
.........

فوق كم يا المؤتمرجي بلا فهم متنبر
لاك سيد في الخلا ولا في البحر متشير
قولك في مديح حالنا الصبح متعبر
زي القام بعد حرجم ضبيحتو.. يكبر
............
ما بنقلب الدرَاب ... ومانصدق الكضاب
و النطانا بالشباك مابنفتحلو خشم الباب
شوفو المؤتمرجي الماكر الملعاب
غير اسمو تاني...وجانا بالقرباب
............
السودان امانة.. ونيلو حقك وحقي
ممهور بي دمانا ومن قديم متسقي
ارادتو مزورة ومن ظلمهم متشقي
كان فرشوها..شعبنا في الضلمة ينقي
............
حلمك يابلد الليلة بدا يتحقق
ديموقراطية تشفي جليدك الاتبقق
الانقاذ خلاص بنيانا بدا يتشقق
حاتم قطع الرقابة.. والسر دقق
.........


رصيدكم في البنوك سندات ومال مسروق
ونحن رصيدنا حبا في القلوب مدفوق
هي لله.. هتافا حالي المنطوق
دخلنابا المساجد وانتم دخلتو السوق
...........
سموك نافع وماك ناف ولا بتنفع ولا بتنفَع
وما بنحط معاك شرف الكريم.. مترفع
من وين جيتنا يا قط الخلا المتصفع
تسب الجدو نبيا في الخلايق يشفَع
..........
يا سوار الدهب.. اصبح سوارك فالصو
بعت الانتفاضة رخيصة حقك خالصو
عشر تالاف مرتب في المنظمة حارسو
التاريخ.. بدينك.. انت والبجالسو
..........
شعب الانتفاضة الحرة.. مابتدجن
هو الشعب المعلم والشعوب يتهجن
الدكتاتور جلدنا وشال حقوقنا وسجَن
بنكسَر قرونو والعضام بترجن
.........
دي معركة واضحة للشعب الجسور.. وجلية
بين جبروت تفرعن وبين ديموقراطية
بين الجبهجية الحكمو بالذندية
وبين احرار.. يحملو شعلة الحرية
..........

استر عورتك يالمؤتمر واتغت
الاستحو ماتو.. واريتك زيهم لو مت
رؤوس الفتنة ديل والخانو للكسكتة
جونا مرشحين والريحة ماليا الحتة
.........
يالانقاذ جمعتي الكوز معا الاتكوزن
بقيتي نشاذ علي الوتر الجنايزي مدوزن
الجايبو الدرب والاصلو جاي مكوزن
يحلقو زي بغاث الطير..ويسقطو جوزن
.........
السودان موحد.. في القلوب منقوش
جنوب وشمال عليك حادبين رموح ورموش
كلام المؤتمر في الوحدة كلو طيش ورتوش
قصدو الرئاسة.. حتي ان كان حدودا الحوش
.........
يا ارض السلام الليلة هشي وبشي
من الحرية انضحي بالعطور واترشي
ارحلي يالغبائن الأصلو مابتنفشي
مادام الوطن بالفرحة نام متعشي
(نستميح الدكتور ودبادى عذرا فى التعديل البسيط الذى جرى لما رأينا إنه يلزم من غير أن يحدث خلل بالمربعات ) إذ أستبدلت جدوده اولاد زياد بجدوده الباشاب فى مروى . حتى تمشى الخيل بروؤسها وللا شنو يا شاعرنا الفحل؟

[محمد عبده]

والله ماخلى حاجة .
وهذه هي الاصوات المحبة والصادقة وعلى المبادي راكزة .
في حق هذا الحزب الاتحادي الديمقراطي الأصل الشامخ برجالاته .

[اسراء معتصم]

دربك ياشقيق قدامو رحلة صعيبة حزبك الإتحادي عصاتك البتمشيبا

[بابكر]

شكرا

للشاعر الدكتو محمد ود بادي العكودابي

علي القصيده الرائعه

و الشكر لك اختي
اسراء

ان اتحفتينا

[أبو الحُسين]

شعب الانتفاضة الحرة.. مابتدجن
هو الشعب المعلم والشعوب يتهجن
الدكتاتور جلدنا وشال حقوقنا وسجَن
بنكسَر قرونو والعضام بترجن

[wael]

لا فض فوك يا الشاعر الرائع

[أبو الحُسين]

فوق كم يا المؤتمرجي بلا فهم متنبر
لاك سيد في الخلا ولا في البحر متشير
قولك في مديح حالنا الصبح متعبر
زي القام بعد حرجم ضبيحتو.. يكبر


والله دي بالغ فيها الدكتور!!!!

[محمد عثمان عمر السنجك]

ضد حكم الارزقية

ضد من باعوا القضية

ضد من فقدوا الهوية

ضد حكم الجبهجية

وضد كل العاثو فينا

يلا يا ناس نبدا حملة

وحملة جملة

ضد كل صرصور وقملة

نقلع اوتاد الرذالة

نمشي بيهم للزبالة

ونسحل اصحاب الضلالة

ونبقي واحة

تدي راحة

لكل معاني

نسمو تاني

بي وطنا

نحقق امالهم اهلنا

نادوا منعم نادوا حاتم

نادوا همسة

وكل مناضل

بينا حسا

كل من صالح ضميرو

كل من انحاز لشعبو

كل من طاوع لي ربو

يلا نفرح يلا نصدح

يلا نحلم

ونبقي ماسكين للزناد

نبقي حارسين للبلاد

نشقي شان راحة العباد

نبني جنة للولاد

ولكل شريفه وكل شريف

نضمن الاكل النضيف

ننسج اللبس الجديد

يرجع الماضي العفيف

نطرد الليل المخيف

وكل من سرقو الربيع

الخلوا كل ايامنا صيف

خلونا بس نفاق وزيف

يلا يا حلوين تعالوا

ويلا يا حلوين تعالوا

[تاج السرفوزى]

ضد حكم الارزقية

ضد من باعوا القضية

ضد من فقدوا الهوية

ضد حكم الجبهجية

وضد كل العاثو فينا

يلا يا ناس نبدا حملة

وحملة جملة

ضد كل صرصور وقملة

نقلع اوتاد الرذالة

نمشي بيهم للزبالة

ونسحل اصحاب الضلالة

ونبقي واحة

تدي راحة

لكل معاني

نسمو تاني

بي وطنا

نحقق امالهم اهلنا

نادوا منعم نادوا حاتم

نادوا همسة

وكل مناضل

بينا حسا

كل من صالح ضميرو

كل من انحاز لشعبو

كل من طاوع لي ربو

يلا نفرح يلا نصدح

يلا نحلم

ونبقي ماسكين للزناد

نبقي حارسين للبلاد

نشقي شان راحة العباد

نبني جنة للولاد

ولكل شريفه وكل شريف

نضمن الاكل النضيف

ننسج اللبس الجديد

يرجع الماضي العفيف

نطرد الليل المخيف

وكل من سرقو الربيع

الخلوا كل ايامنا صيف

خلونا بس نفاق وزيف

يلا يا حلوين تعالوا

ويلا يا حلوين تعالوا

رائع يا السنجك بروعة الكلام الجميل دا وزيدنا من دررك شوية

[محمد جمرة]

التحية والتجلة لهذا الهمام الذي يعبر عن شارعنا العريض
ويا بخت حزبنا بأمثال من يصنعون مثل هذا الإبداع
لك الشكر د. ود بادي
ومرحبا به فارسا من فرسان حملاتنا الانتخابية الذين يشنون الغارات الظافرة على جيوش الخصوم الخاسرة
التحية لك أخي تاج السر

[تاج السرفوزى]

التحية والتجلة لهذا الهمام الذي يعبر عن شارعنا العريض
ويا بخت حزبنا بأمثال من يصنعون مثل هذا الإبداع
لك الشكر د. ود بادي
ومرحبا به فارسا من فرسان حملاتنا الانتخابية الذين يشنون الغارات الظافرة على جيوش الخصوم الخاسرة
التحية لك أخي تاج السر
لك الشكر الجزيل اخى محمد جمرة على المرور الكريم منك وإنشاءالله نلتقى يوم النصر

[حسن مساوي]

شعر جميل مشكور
نسال الله ان ينصر السيد حاتم السر
حتي يخلصنا من هذه البلوه
حاتم حاتم للتغير

[الطيب شيقوق]

خوجل في المحاص بي توبك الجرجار


لا حول ولا قوة الا بالله

الله يطول عمرك يا ود بادي

دي والله لوحة لا يسبر اغوارها الا القليلون يا ود الحسين

ولا يدرك هذه الصورة الا من راى الصقر المكنى (بتلنق) وهو الصقر الذي ينزل على الرمة بعد يجروها برة الحلة من ريحتها النتنة - والرمة هي الحيوان النافق

هذا الصقر عندو جوجاى ( شعور بالعظمة ) حول الرمة تماثل جوجاي عظماء القوم واحيانا مشايخ الطرق الصوفية

ورجل بتجوجاء يعني رجل يملأه الفخر والاعتزاز عندما ياتيه ضيوف اكارم

جاييكم لشرح كل القصيدة لاني اعلم ان ادب الاخ الدكتور ود بادي موغل في المحلية الممتعة

عبركم احييه وانقل له تحايا ابناء عمومتى امبلي وامبلي وامبلي

الطيب شيقوق
المحامي

[احمد محمدالحسن محجوب]

ودبادي بارك الله فيك في هذه الدرر المنظومة في قايد التغير والريئس القادم بعزيمة الاحرار من ابناء شعبا الباحثين عن الحق والعدل والحكمة في القيادة الرشيدة المتمثلة في ابناء الاتحادي والمجسدة في حاتم السر

[مأمون الشيخ]

التحية لك شاعرنا الفحل ود بادي: مثل هذا الكلام أشد عليهم من وقع النبال،لأن الإبداع لا ينمو ويترعرع ألافي محاضن الحرية والديمقراطية.

[تاج السرفوزى]

لا حول ولا قوة الا بالله

الله يطول عمرك يا ود بادي

دي والله لوحة لا يسبر اغوارها الا القليلون يا ود الحسين

ولا يدرك هذه الصورة الا من راى الصقر المكنى (بتلنق) وهو الصقر الذي ينزل على الرمة بعد يجروها برة الحلة من ريحتها النتنة - والرمة هي الحيوان النافق

هذا الصقر عندو جوجاى ( شعور بالعظمة ) حول الرمة تماثل جوجاي عظماء القوم واحيانا مشايخ الطرق الصوفية

ورجل بتجوجاء يعني رجل يملأه الفخر والاعتزاز عندما ياتيه ضيوف اكارم

جاييكم لشرح كل القصيدة لاني اعلم ان ادب الاخ الدكتور ود بادي موغل في المحلية الممتعة

عبركم احييه وانقل له تحايا ابناء عمومتى امبلي وامبلي وامبلي

الطيب شيقوق
المحامي

حيَّاك الله الأستاذ العظيم شيقوق
ولك منا جزيل الشكر على شرح مفردات القصيدة العصماء للشاعر الفحل الدكتور ودبادى ربنا يذكره دائما بالخير ويمتعه بالصحة
الدكتور ودبادى أتانا بسدأة القصيدة نظماً جميلاً , فنرجو من حضرتك الإسراع بلُحمتها شرحاً وتفصيلاً

[أبو الحُسين]

أُستاذي الفاضل تاج السر سكنيجو وضيوفه الكرام...

بُشرى لكم... لقد قام زميلنا في المنتدى ياسر عبد الحي بتسجيل هذه الملحمة بصوت الشاعر ود بادي ووعدني بإنزالها قريباً بالمنتدى...

لكم جميعاً مودتي... وفي انتظارك يا مولانا ود شيقوق...

[ود الخليفة]

تاج السر فوزي
تسلم يا الفنان وكم يعجبني أبداعك و كرمك أنت النور البتعكس الأنوار
يسلم الدكتور محمد بادي العكودابي
يسلم ود أمنا عائشة بت محمد خير
وحاتم مو دأب أولاد زياد ولا الباشاب دا الخير البعم مليون ميل موحد
ودعوا معي لحاتم بالتوفيق و النصر المؤزر

حويتك العباد والزكار
للقران موقدين نار
حويتك جدك أبسبار
وكل من في قبة ولا ستار
ناس الخلوة أهل الطار
و فيض الاله يصب مدرار
حاتم مسنود بسيد الدار
في جاه الختم سادتي الأخيار
دعواتنا ليك عشاء وبالأسحار
مؤيد بجاءه النبي المختار

[أزهري محمد سليمان]

التحيه اليك شاعرنا الفحل ود بادى

نرجو من اسرة المنتدى تثبيت القصيده عاجلا مع تحياتى

[أبو الحُسين]

حزب الاتحادي الاصلي اصلو مركن
خيلو مأصلة وزي الصقور اتفكن
ناس المؤتمر في اللفه خيلن جكن
ومتحول كبيرن في الحداره مجكن
ــــــــــ

ليك وحشة قريبي تاج السر... لا أسكت الله لك إنترنيتاً...