فضلنا أنا وإنتي قاعدين راس ...!!!

[عبد العظيم الطاهر]

ساعتي العرست مرتي .. ياها الأسع معاي دي ... مرة كدي كنا قاعدين برااانا ... قت لها نبدأ برانا .. وننتهي برانا .. في آخر عمرنا ... إن الله مدا في الاعمار يجوا البطان كلللهن كان بنات كان ولاد يعرسوا ويفوتوا ويخلونا .. ونجي نصنقر انا وإنتي وَحَّدنا .. وشياتنا في وشيات بعض .. وإتخيلت إنو الشي حصل ... وقمت قت لها ... :-


فضلنا انا وإنتي قاعدين راس
وشياتنا التقول كراس
**********
ولَّى عميرنا راح إتماص
حليل الدنيا ماشي نقاص
وإتكرمش جسيمنا خلاص
بلا سبب الرويس رقَّاص
***********
بناتنا خلاص بقت أمَّات
حليل غناينا داك المات
وآخر ولدة في الجنيات
رحل خلانا عرَّس وفات
******** ***
حنيكي تقول ضنيب الحوت
كليمة تجي وكليمة تفوت
وفوق ضهري السَّرج مختوت
أكاشِت في مشيَّا وأشوت
************
وإنتي بقيتي زي كورية
فوق بطن الصحن مكفية
أناضمك ما تردي عليّا
عملا لي المغس والكيّة
************
شعيراتك شديرة الفاس
وماب تشبه شعور الناس
تشَّهِقي ماسكك أب دوماس
وفي نومك يجي أب كبّاس
************
زمان إن قلت إسمك ساي
تجيني جري وتقولي عشاي
وأسه حديثي أردو براي
زي زولاً يمص في الشاي
************
زمان كملت فيكي غنايا
وأديتك شبابي صبايا
كنتي البسمة في دنيايا
شمعة روحي ليك ضوايا
************
وكانت بينا أجمل عشرة
طيبة وارتياح ومسرة
وما جِب لك مِريتاً ضرّة
شغلك لي كجار ومضرّة
***********
حرَّمت المروق لى برا
خليتو الحديث بالمرة
كان ساكت خشيمي انفرا
وشك مالو لي ينصرّا
***********
لى الليلة الخَرَف راجينا
بس ربك كريم ينجينا
ما نتلتَّ نرقد طينة
فوقنا الدنيا ترمي عجينا

[عيدابي]

عبد العظيم الطاهر
صدق انا اقرأ في هذه الابيات
الحلمنتيشية الواقعية اتخيلت اني
كبرت وقاعد في شمس الشتي
ومتلفلف بي شال مصر التقيل
داك والغاشي والماشي يديني السلام
وارد على واحد وواحد اقولو تب عليك
آلولادي المايلي اسبوعين ما اشوفك
وتقولي كيف حالك آ خالي يخلخل ضروسك
تصوير جميل ماشاءالله عليك
ونسال الله حسن الختام
ومن القوى للهوى زي ماب تقول حبوبتي
رحمة الله عليها
دمت بالف خير

[اسراء معتصم]

اخونا عبد العظيم ماشاء الله عليك والله كلمات في غاية الانسجام والروعة تخلي الزول يرجع ليها كل مرة

[أبو الحُسين]

حنيكي تقول ضنيب الحوت
كليمة تجي وكليمة تفوت
وفوق ضهري السَّرج مختوت
أكاشِت في مشيَّا وأشوت
........................

دي باقي انا شاهد عليها من زمن شبابكُن:D:D

عبدو جدة يا صاحبي... ليه كدة يا اخوي... بالرغم من الشباب خليتْنا عِشنا الدُور العجايْزِي دا نتخيَّل فيهو قُبال يصلنا:060:...

ويا عملات العجوز التاني دا إن شاء الله من القُوة للهُوَّة:schmoll::schmoll:

[تاج السرفوزى]

والله يا عبدالعظيم يا اخوى لو قرأت قول ابوالطيب المتنبى فيما يؤول له حال الزوجة أو المحبوبة فى مقبل الأيام ما كنت دخلت فى خوف يصير له الحال فى المستقبل واليك بيت ابوالطيب:ــــ
لو فكر العاشق فى منتهى ** حسن الذى يسبيه لم يسبه
اعمل قياس لذلك بنساء تخطين سن الخمسين أو ما يزيد بمَنْ هن فى سن دون العشرين بقليل ,تخيل انت تنظر لغادة حسناء فى سن العشرين من المؤكد لم تكن نظرة عابرة لها قليل أوكثير من وقفة تأمل ,لكنك إذا تأملت تلكم الحسناء بنظرة ابو الطيب لأعوام قادمة لم ولن تتعلق بشئ لزوال .
لذلك إذا كان ولابد إنك متعلق فلا تركن الى ماهو متغير فعليك بما لاتندم عليه

[مأمون الشيخ]

لى الليلة الخَرَف راجينا
بس ربك كريم ينجينا
ما نتلتَّ نرقد طينة
فوقنا الدنيا ترمي عجينا


آمين وأدء رائع ياأخ عبد العظيم ويبدو أننا موعودون بإضافة نوعية للمنتدى.

</b></i>

[أزهري محمد سليمان]

راااااااااااااااااائع يا استاذ عبدالعظيم

[رنا كمال]

وإنتي بقيتي زي كورية
فوق بطن الصحن مكفية
أناضمك ما تردي عليّا
عملا لي المغس والكيّة
.....................

كامل تضامني مع عجائز المستقبل:044:

[تاج السرفوزى]

وإنتي بقيتي زي كورية

فوق بطن الصحن مكفية
أناضمك ما تردي عليّا
عملا لي المغس والكيّة
.....................


كامل تضامني مع عجائز المستقبل:044:

دا ما المستقبل المخيف ذاتو يا اخت رنا والخوف من تغير الحال لحالة فى فترة ما كانت يوم فى الحساب ودا ياهو القاصدو شاعرنا ابوالطيب المتنبي

[تاج السرفوزى]

سُـئل أحد الحكماء..

من هو أغبى خلق الله ؟؟

فقال: الرجل !!

فقيل له: وكيف استدليت على ذلك ؟؟

فقال: ينعم الله عليه بأخذ روح زوجته وما يلبث إلا أن يتزوج بأخرى.

فهو "كالقط يشتاق لخانقه"

فقيل له: ومن أغبى منه ؟؟

فقال: الرجل الذي ما تزال زوجته على قيد الحياة

فيتزوج بأخرى اعتقاداً منة أن النساء يختلفون

فيجتمع عليه الهمّان

فيصبح "كالمستجير من الرمضاء بالنار"

ثم أخذ يبكي !!

فقيل له: وما يبكيك ؟؟

فقال: أنا أغبى خلق الله.. فأنا من ارتكب الغلطتين !!