أشوفك في الصباح مندلي حياك النخيل
وأسراب القماري تهلل تسجع بالهديل
رشاك الدُعاش بالفُل وأطياب الخميل
وأمواج البحر يا خلي لي شوفتك تميل
الوالدة الحنونة تملي تحلم بالعديل
ياسندي وضراي يا ضُلي من شمس المقيل
دايراك فيالمحل تبهلي دفِّق ما بتكيل
دايراك للبلد والحلي تلحق ديك وديل
ودايراك ياعشاي تسهر لي يوم اليوم تشيل
أشوفك في المساء تدلي فى الختمة وتميل
تشرح فيالكتاب وتعلي في رسالة الخليل
حضرات الختم يا خلي والذكر الجزيل
لي راياتا انت معلي ساقياك سلسبيل
أشوفك في البعيد متمني حُزناً كيف نبيل
أشوفك في المدى متولي درباً كيف طويل
أشوفك بالضياء متحلي والأنوار تخيل
أشوفك كل يوم يا خلي من ذاك القدير
صورتك بين عيوني وكلي والقاك مستحيل
شريان الشمال أحزني يتَّم ذي قبيل
قبلك شال "سنيك" يا خلي ولداً كيف عديل
عبدالهادي سيفي وضُلي في الزمن البخيل
دمك فوق دماه يصلي سجدات النخيل
يرشح بالمسك ويجلي بوحات يوم تسيل
ياريتني وعساي يُدعلي لو ياريت تجيب
يوم اليوم فديتك خلي لو كنت البديل
نحلم والقمر متجلي بالزين والعديل
لكن القدر ما بخلي للاحلام سبيل
عابر كالشهاب متمني ذي برق الصهيل
فوق قيف الأمل مستني للفجرالجميل
تقطع من حشاك وتغني من لحن الخليل
كأنك في الهيام وكأني من ذاك الرعيل
ود توم عنكم يسألني وين ذاك الأصيل
وأيامنا اللي راحات عني ياحليلا وحليل
وآشوق القماري الجني فى ساعة المقيل
يبكنك سوى ويبكني والبي ماقليل
باكيات الشمال خلني من ذاك العويل
عبود في الجنان متهني في ضيافة الجليل
كان أملي ومُناي توصلني وألقاك ذي قبيل
لكن الزمن قافلني عجًّل بالرحيل
لو كان القدر أمهلني بس لو كان قليل
كان أنزل مراتع حِني وأحضان النخيل
في ساعة الوداع تحضني بالدمع الهميل
ساجعات الأراك عزني يا حليلو وحليل
عبود في الجنان متهني في ضيافة الجليل
حاير بين يقيني وظني والقاك مستحيل
|
التحية والتقدير للدكتور ياسين محمد ياسين...
وموقع التوثيق الشامل...