وداعا ما يفرط فيك يا للى فرضو مافطيت
يا للى عهدو ما جافيت
تشهد ليك جوامعنا وفيها وياما كم صليت
وصمت فروضك الواجبات ابدا ليها ما خليت.
وكنت تصلى نص الليل وماكليت وما مليت
لاهج بالذكر قلبك منور وضاوى لينا البيت
انت البارى بى والديك وانت العاطى بى ايديك
وانت اخونا وانت حبيبنا ولدنا الديمة نشتاق ليك
ياحاتم كريم انت وشبية اسمك وخايل فيك.
انت عريسنا زفيناك وجرتقناك فالا ليك
وسيرناك لبيت عدلك يهنيك ويبارك فيك
وقلنا صبرت واللة اداك عروسا تهنا وتهنيك.
وانحنا اتارى ما عارفين انة الموت منشن ليك
وانة القبر كان راجيك تضوية ويوسد ليك.
ويحى عليك ياخوى انا الفى الغربة ببكى عليك.
انا الفى عرسك ما غنيت وكان من قلبى بدعى اليك.
بهنيك وبمنيك واعود من سفرى وابارك ليك
انا اليوم جرتقوك ماحضرت وكان منايا ازغرد ليك.
واسوى السيرة واعرض ليك.
وانا البوصى فى نصورة شريط حاتم امانة عليك.
مع الجايين تجيبوة اشغلو وارقص وافخر بيك.
اخوى عرس يا صاحبا ت ماشاء اللة يغطى عليك.
وعلى مرتك يهنيكم ويبارك فيك.
حاتم زينة يا بنوت ودا البتباهى بيهو بيوت.
وتحلف بى حياتو نذر عرس زينة البنوت.
امك ديمة راضية عليك نلت رضاها قبل الموت
وابوك فرحان مخا ويك يمدح ليك فى البراق
وياحاتم جميل صوتك وكت تمدح معا البراق
اتارى الموت ملبد ليك شال ولدا سمح ما عاق.
اميرة صلاح عبد القادر
/استراليا/ سيدنى
الاحد19 /12/.2010