الاخوة والاخوات اهدي لكم هذه القصيدة بمناسبة عيد الام
مع خالص الدعوات لكل الأمهات بالصحة والعافية
ومن توفاهم الله الرحمة والمغفرة في دار الخالدين
كتبت هذه القصيدة بمدينة ابها جنوب المملكة
*************************
( رسالة إلى أمي )=
***************************=
وصيتك ليّ جات يا يمه.. وأحرف شوقك المنساب=
ظنك زين وظني الدايرو..شايفو الليلي زي الخاب=
*******=
من ما فته منك يمه ..لا دي اللحظة شوق وعذاب=
الشقا والضياع في الغربة..خاتراً ليّ تب ما طاب=
*******=
ظلام الليل مخيف في الغربة.. لا طنبور ولا أصحاب=
لا أخو يستر المكشوفة..لا جاراً بشوش مِطياب=
******=
الشغل إنعدم يا يمه..اللقه شوفتي ليهو رهاب=
الأمل القبيل كت عايشو..ليقتو بعد وصولي سراب=
******=
عمرك شفتي مويتاً صابي.. لا براق ولا سحاب=
ديلا دموعنا فطن الغربة..لكن الدمع شن جاب=
******=
الحزن انتشر بيناتنا.. الفرح إندسر تب غاب=
كيف نتهنى عاد يا يمه..كيف نرتاح ونحنا أغراب=
******=
والزمن العنيد زي عادتو.. للنوح والأنين جلاب=
شن طعم القروش يا يمه..زول لا إلفه لا أحباب=
******=
راحت البال عدم يا يمه. بي الّلقه ما أظن تنجاب=
الشوق في بلاد الغربة .. زي جمراً مولقد هاب=
******=
وكيتاً لينا بيها رضينا.. نحنا الليها جينا قراب=
يا ريت كل يوم يا يمه.. لو منك يجيني جواب=
******=
ده المقدور وقع يا يمه..ليهو أنا ما عملت حساب=
واتوكرت كيف الشورة..الحل في دعاك إن صاب=
******=
صلواتك دغيشاً بدري .. .. لما يوشوش الهباب=
بينك وبين رجاك في الله .. أوعك ما تتاقي الباب=
******=
دعواتك تفج الغمة .. تدحر عني كل صعاب=
صلواتك تحل الكربة .. لي تيه الخلاص ديداب=
******=
تشتكي من بكاى عيوني .. واشرب من دموعي شراب=
متين أرجع وأجيكم تاني .. وأشدو بلحن زي زرياب=
-----------------------=
عيدابي=