[حسن مساوي]

البنطون جابو لينا
يا علي البنطون جابو لينا
الفزع ياسيد الجنينه
كدي اشمل نظرك علينا
البحر لا يطلع يجينا
ياعلي البنطون جابو لينا
الفزع ياسيد السرايا
يالسيد علي ود مساوي
الفيضان قالو جاي
انت اوعك تنسى مساوي
ياعلي البنطون جابو لينا
تصيحلك بت اميمينة
انت تشحد ربك يعينه
تعافينا وتقتينا
وتنطرح البركه فينا
توسع لنا ليالينا
البلد تسند فوق امينه
ياعلي البنطون جابو لينا
نكوركلك يا علينا
ونحدث فيك يادخرينا
يا اسد الشام والمدينة
دايرنك فسرع تجينا
وتشوف الحاصل علينا
ياعلي البنطون جابو لينا
نكوركلك ياحجانا
ياصاحب السر والديانة
ياريس الحضرة باركانة
دايرنك تفزع معانا
نحن بلدنا عاجبانة
ومروقنا من البلد هانا
ياعلي البنطون جابو لينا
نحن فينا كبيرا يشيلو
وفينا عزيرا يقودو
البحر مابنقدر نخودو
يجينا الليث بي جدودو
البحر يرجع لي حدودو
ياعلي البنطون جابو لينا
ندهت انا طيب المجالس
نهمت المرغني الفارس
يكف بحرا جانا كارس
نهى النادي والمدارس
ياعلي البنطون جابو لينا
المحافظ جانه بي سرعة
جاب بنطونو بالترعة
خايف لنا من الخلعة
ياعلينا الفوق ظهروا نرعة
ياعلي البنطون جابو لينا
نحن الموضع مشتهنو
حديثنا وبركتنا منو
ولاد سيدي علينا حنو
بعيد شيلو الموية منو
ياعلي البنطون جابو لينا
كدي انده جدك وابوك
نحن بلدنا مدروكة
اوعك الناس لايلوموك
ياعلي البنطون جابو لينا
الصلاة وتسليم لي نبينا
تفوق قبرو الفي المدينة
تحن تتفضل علينا
ياعلي البنطون جابو لينا