بسم الله الرحمن الرحيم وبه الاعانه بدءاً وختما
وصلى الله على سيدنا محمد وعلى اله وصحبه ذاتاً ووصفاًوأسماً
يامنادى ناد عثمانا الختمى اهل العرفانا
بسم الله فى مبدانا بالله الحاضر معانا
جل الخلق سوانا محرك حرك اعضانا
ثنيت بى حجانا طه اب جاهاً حوانا
يوم ضجوا الناس محانا يخمد حمو النيرانا
ليلة ميلادو بانا جاء نظيفاً مو وسخانا
النور ضوى الكيانا للروم ولى كنعانا
أتكسر الايوانا وانهدم البنيانا
والنهر غاض فى الآنا والنار خمد دخانا
اعظم معاجزه كفانا شاف الاله عيانا
بفرائضه الخمسة جانا فرتك دين الكهانا
يا اهل الاساس بشرانا شيخ الطريقة جانا
سيدى الختم عثمانا الختمى اهل العرفانا
السيد عثمان لاشكا ابواتك اشراف مكه
النور من نور مزكا بيك عند الضيق نتفكا
السيد عثمان حقيقة مثبوت شيخ الطريقة
بس صيحلو عند الضيقة يلفاك قبال دقيقة
عثمان سيدى المسمى ذو البركة وجاهو عما
اولاد شفيع الامه شافعنا يوم الطمه
عثمان الخلفوه فى مكان جده وابوه
فى الحضرتين ولوه والامر سلموه
سير ياعشوق قوماكا لى حسن الساكن التاكا
زور الضريح هناكا تبلغ جميع مناكا
يا اهل الامر كليه افرادا للغوثية
ناس حسن ابجلابية تصريفو من العلية
ساداتنا الميرغنية اهل الدرجة العلية
فى الحضرة النبوية ليهم رفعه وخاصية
ابن الياس الحسينا متوسل بى نبينا
ياالله يابارينا تغفر ذنباً علينا
اسمه الخليفه احمد متوسل بى محمد
ياحياً باقى مفرد تغفر لى ذنبه يسعد
صلوات من الرحمن عدد اليكون والكانا
ترضى النبى وترضانا ويرجح بها الميزانا