القبول يا رب - شباب الطريقة الختمية بدائرة ود ابراهيم بأم بدة

مجموعة مدائح ختمية.. شباب الطريقة الختمية بمسجد السيد علي الميرغني ببحري


غير مسجل أهلاً ومرحباً بكم

العودة   منتديات الختمية > الأقسام العامة > المنتدى العام

المنتدى العام لقاء الأحبة في الله لمناقشة جميع المواضيع

رجالٌ حول الديكتاتور.. مشهد أول..

المنتدى العام

إضافة رد
 
أدوات الموضوع إبحث في الموضوع انواع عرض الموضوع
قديم 02-04-2018, 09:14 PM   #1
Ya Mirghani
مدير عام
الصورة الرمزية Ya Mirghani



Ya Mirghani تم تعطيل التقييم

Gadid رجالٌ حول الديكتاتور.. مشهد أول..


أنا : Ya Mirghani




رجالٌ حول الديكتاتُور.. مشهد أول!!!
بين ابن السِكِّيت ود. نافع!!!
جمال أحمد الحسن – 4 فبراير 2018م
بعد سقُوط الخلافة الراشدة بنهاية حُكم الإمام الحسن بن علي في ال 40ه، بدأت الديكتاتورية الأموية تَتَفنَّن في تطويع الناس وإذلالهم وإهانتهم!! ونجحت في تقسيم المُسلمين حينها إلى ثلاث طبقات:
- جماعة مُقرَّبة من السُلطان لهم الحظوة والصوت العالي، (الأمويون وذئابهم البشرية)
- جماعات مغضوبٌ (عليها) مُطاردين أينما حلُّوا، (أهل البيت النبوي الشريف ومُريديهم).
- وهناك مجموعة أخيرة تستخدم التُقية للعيش الكريم (كسيري بي لبيني يعني) بين هاتين المجموعتين المُتنافرتين...
وأظن بطل قصتنا دي كان من النُوعية دي!!!
سار على هذا الدرب والمنوال كل الطُغاة الذين أتوا من بعدهم على مرِّ التاريخ والعصور!!!
تمُر الأيام والسنين حتى يأتي دور الطاغية جعفر بن (المُعتصم بالله) محمد بن (الرشيد) هارُون والشهير ب (المُتوكِّل على الله)... وطبعاً دي أسماء إختارُوها من عندِ أنفسهِم لزوم إضفاء نُوع من صبغة التقوى المُحبَّبة لدى نفس المُسلم العادي بالفطرة!!!
المتوكل دا بعد مسَكْ الحُكُم والامور استقرت في إيدُو...
وبقى الحاكم الناهِي... المُتسلِّط على البلاد والعباد...
في يوم من الأيَّام جاتُو نفخَة كضابة كدي معاها نَفْشَة ونفسُو الأمَّارة بالسُوء إتخَيَّلْتْلُو بل أيقَنَتْلُو المُو نجيض (أنه) مثل الإمام علي بن أبي طالب... ومحل رقيقي التِتْقَطِع!!!😡
وعندُو ولدين سفهاء كدي إتخيَّلُن زي الإمام الحسن والإمام الحُسين، واعلى ما في خيلك أركبُو آ ابليس كمان!!!👿
في عهد المتوكل دا كان في مُدرس بتاع لغة عربية مشهوووووووور كدي إسمو يعقُوب بن إسحاق بن السِكِّيت ومن شدَّة شهرتُو كان إسمو (شيخ العربية)... وكان مرغُوب عند الأُمراء والوُجهاء لتأديب أبنائهم على اللغة العربية وقواعدها... يعني كان مُؤدِّب نمرة واحد...
علي شَقاوْتُو جاء إشتغل عند المتوكل دا عشان يأدِّب ليهُو ولادُو السُفهاء الإتنين (المُنتصِر بالله) و(المُعتَز بالله)... أها شغَّال معاهُم تمااااااام التمام يا حليلُو...
ومرَّة مرَّة كدي ياخُدْلُو قعْدَة جنب الديكتاتُور... من باب الوجاهة يُرضي بها طمُوح النفس الأمَّارة بالمفخرة والجَخْ والكشخَة!!!
أها.. عندُو صاحباً ليهُو كدي مُخلص كان قاعْ يحذِّرُو... يا ابن السكِّيت يا اخوي... درِّس درُوسك وقُشْ خشيمك وابقى مِتْخَارِج الحسكَنِيت دا لااا تقعُد جنبُو شي!!!
ومع ضغوط النفس القبيل ديك ما سمع كلام صاحبُو شي...
أها يُوم كدي في لحظة صفاء مع الطاغية... قام سألُو...
الديكتاتُور: الحسن والحُسين ولَّة ولَدِينِي ديل؟؟؟ الأفضل منوو؟؟؟!!!!
ابن السكِّيت: ولادَك منُن؟؟🙈
الديكتاتُور: المُنتصِر بالله والمُعتز بالله!! القاعْ تعلِّم فيهُم ديل ماك عارفُن يعنِي ولَّة ماك عارفُن؟؟؟!!!
إبن السكِّيت: الله يرضى عليك ما تعفيني من الإجابة!!!😷
الديكتاتُور: أعفَاكْ كيفِن وشهادة زي دي أنا راجيها لي زمن وأهيِّئ ليها في الفرص!!!
أها... قُولك شنو؟؟؟
هنا... طبعاً في خيارين لا ثالث لهما...
يا إمَّا ينافِق... والتاريخ آآآآآب يرحمُو شي... زي في شاعر لا قدَّام كدي وصف الولدين السُفهاء ديل ذااااااتُنْ بأنهم (المهدي المُنتظر) تنقَرَنْق والتاريخ سجلُو تب...
ويا إمَّا يقُول الحقيقة ويرجَى الراجِيهُو!!!
وكدي قبل ما نشُوف رايُو... وقبل ما تكمِّلُو باقي المقال للنهاية، إنتُو كان حا يكُون ردَّكم شنووووو؟؟؟
المُهِم شيخنا ابن السِكِّيت قلَّب الكلام في راسُو وفي النهاية عرِف خلاصُو... واتوكل علي الله وقال ليهُو: وجه الشبه أصلاً ما موجُود في الحالة دي...
يعني إنت عشان قاعْ تدِّيني راتب عشان تدريسُن... عاوزني أساوِيهُن وأقارِنُن مُجرد مُقارنة بسيدي شباب أهل الجنة الأخيار أبناء الأطهار؟؟؟ ولسان حالُو يقُول ليهُو: قُوم لِفْ بالله!!!
كَفْ وكَجَّامتُو قبضَت.. ولا حولُوهُو لي قاضي ولا محكمة عادلة...
في لحظتُو أمر ب (سلِّ) لسانه من قفاهُو!!! وعصرُوهُو فوق بطنُو بواسطة جنوده لامِن راح فيها!!!😿 الله يغفِرْلُو ويرحمُو ويحسن إليه...
وهذا المتوكل من شدَّة كرهه وبُغضه لآل بيت النبي صلى الله عليه وآله وسلم أمر بهدم ضريح الإمام الحُسين وهدم بيوت الجيران الجنبُو، المسكين قايِل نفسُو حا يمحى سيرتُو لا جنا الجَنَا... فبقيت سيرتهم أهل البيت طيبة محفوظة على مرِّ السنين وظلت تطارد أعداءهم من النواصب والخوارج اللعنة إلى يومنا هذا...
وسُبحان الله... اليبغض السادة لابُد له من الهانَة والذِلَّة كما قالُو!!!
نفس هذا المصير وأشَد شويي لقاهُو من ولدُو السفيه (المُنتصر بالله)... قتلُو شر قتلة عشان يستعجل يمسك الحكم البعيد!!!!
الديكتاتُور لا أمان له وما فيهُو خير لأقرب المُقرَّبين إليه!!! يبيع أبُوهُو، أمُّو، أخُوهُو حتى جناهُو الولدُو من بطنُو دي عشان كُرسي المُلك!!!
ولا تستغربُو تقُولو كيفن الرجل يلد من بطنُو المفروض اقُول من صلبِه!!!
لا لا لا مقصُودة... باقي في واحدي من أُمهات بني العباس ديل إسمها (الخيزران) قَتَلَت إبنها الكبير عشان يستلم الحكم أخُوهُو اللي هُو ولدها التاني!!!
.
.
.
ثلاثةُ أملاك.. فأما محمدٌ (المُنتصر بالله)... فنورُ هُدَى يهدي به الله من يهدي
وأما أبو عبد الإله (المُعتز بالله) فإنه... شبيهُك في التقوَى ويُجدِي كما تُجدِي
وذُو الفضلِ إبراهيم (المُؤيَّد بالله) للناس عصمة... تقيٌّ، وفيٌّ بالوعِيدِ وبالوعدِ
فأولهم (نورٌ) وثانيهُم (هُدَى)... وثالثهم (رشدٌ) وكلهم (مَهْدِي)!!!!!
# مروان بن أبي الجنوب شاعر البلاط العباسي المُتمَلِّق!!!

Ya Mirghani غير متواجد حالياً   رد مع اقتباس
إضافة رد

مواقع النشر (المفضلة)
كاتب الموضوع Ya Mirghani مشاركات 0 المشاهدات 3873  مشاهدة صفحة طباعة الموضوع | أرسل هذا الموضوع إلى صديق | الاشتراك انشر الموضوع


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 02:27 PM


Powered by vBulletin® Copyright ©2000 - 2024, Jelsoft Enterprises Ltd.
::×:: هذا المُنتدى لا يمثل الموقع الرسمي للطريقة الختمية بل هُو تجمُّع فكري وثقافي لشباب الختمية::×::

تصميم: صبري طه