أبوي يحاكي في القَعُويِي

07-29-2010, 12:28 AM

عبد العظيم الطاهر

عبد العظيم الطاهر is on a distinguished road

أبوي يحاكي في القَعُويِي - قصة

أنا : عبد العظيم الطاهر

سجل معنا لتتمتع بهذه الخاصية


	لاقيتو في الجامع الجنبنا بعد صلاة المغرب ... اليوم كَانْ جُمْعَه ... ماسك السِّبْحِي في إيدو وكَارِبْ العِمِّيْ فوق رَاسُو...أوَّل مَرَّة أشُوفُو لابِسْ لُو عِمِّي ... مَا قَاعْ يَعَرِفْ يَلِفَّهَا شِيْ ... مَجَخْسَنَة ومَشَنْتَلَة كَدِي ... ومِنْ شِدَّةْ مَاهَا كَبِيرِيْ , مَنْفوُشَه بِتِلْ وَدْ الوَاطَا القَاعْ يَقُوم فِيْ الخَلاء دَاكْ... قُتْ لُو وين مَاكْ بَايِن ...؟ ليك مُدَّة مَا قَاعْ نَشُوفَكْ ..؟ قال لِي والله ياخي ... لَمُوا فوقي ناس كَدِي دُقُونُهُم بِتَل الحَلْفِي الفُوق الحَفِير ده ... الدِقِن اللَّت عبدالرسول سياف جَنْب دُقُونُنْ .. بتل فُرشة الاسنان جَنْب المُقشَاشَة ... سِمْعونِي مَرَّة كَدِي قَاعْ أمْدَحْ قَالُوا لِي يَاخِي حِسَّك سَمِحْ ... تعال النَّعَلِمَك التَّجْوِيدْ ... قُمتَ مَشَيت لَهُنْ ... آ زول أوَّلْ حَلَقَة دِي ,أسْكُتْ سَااااكِت بَسْ خَلَّنِي , الدُور جَانِي فِي القِرَايِي ,فَتَحْت المَصْحَف وبِقِيت أقرأ , وَهُنْ بًى شَيخُنْ سَاكْتِين سَاااااكِتْ .. مَا صَلَّحونِي شِي ..النَّاس القَاعدِينْ مَعَاي كُلَّهُنْ يَصَلِّحُوا فِيهُنْ ,أنَا وَ لا كِلِيمِي مَا صَلَّحوهَا لَيّ , قُتْ آ زول أتَارِينِي بِتِل فَلاحتِي ماَهَا فِي , رَاسِي بِقَى غَلِيدْ بالحيل , أَقْرَأ و أبُوبِحْ لَهُن فِي حِسِّي ... مَرَّة أخُتْ إيدِي فوق أضَانِي .. ومَرَّة أمِطْ لَهُنْ رَقَبْتِي لا فوق وأهوزِزْ في حِنيكِي ... بَس عبدالباسِط عبدالصَمَدْ ومَرَّة انْتَكِي جَاي ومَرَّة جَاي , اللُورِي المَاشِي فِي الرَمْلَه ... قَالوا لِي : أحسَنْتَ وجَزَاكْ الله خَير .. وسَكَتُوا ... الجُمْعَة البَعَدَها إتْحَنْفَشْتَ بِالحيل قُلْتَ أمشِي لُنْ أوَّلْ زول ... جَلاّبِيتِي وعِمِّتِي بَلَّيتِنْ فِي الطَّشِتْ مِنْ يوم الأْربَحَاء ...مَرَتِي كَانَتْ مِتْحَنِّنِي ... خَايفِي الحِنَّة اللَّتا تَمْرُقُ بَالغَسِيلْ وكَدِي يَعْنِي .. قُلْت أغَسِّلِنْ أَنَا بَرَايْ ... أهَا أجِي أدِّيهِنْ دَعْكَه وأخَلِّيهِنْ رَاقْدَاتْ فِي طَشِتِنْ قَبَلِنْ ...وأَمْشِي أحُوووومْ حُوَامْتِي , وأَجِيهِنْ تَااااانِي أَدِّيهِنْ دَعْكَه ... مَرَتِي دَاخْلِي ومَارقِي تَعَايِنْ فِيهِنْ وتَلِف خِشيمَها بى صَفْحَه بِتْل البِتَمْصُر لَهَا فِي بِشْكِيرْ... قَالَتْ لِي إنْتَ الشِي دَيلْ دَارْ تَعَلِّمِن العُومْ ..؟ لَيهِنْ يُومَينْ مَزَازِيهِنْ بَالدَّعَكِي حِكَنْ المَشَمِّعْ ..؟ الشِّي دَيلْ بِقَنْ بِتْل اللَّحَمْ الفِي السَلِيقِي ... هَرَدتَّهِنْ هَرِيدِي ...كَفَاهِنْ ... بينِي وبينْكُْ أنَا كُتْ جَايْ أرَجِّيهِن الجُمْعَه الصَّبَاحْ , عِلا بَالنِّقِّي اللَّتها مَرَقْتَهِنْ يوم الخَمِيس ... ظَهَّرْتَهِنْ آ زول بى قَلَمْ اللِّيلْ كُوبْيَا ...وعَلَّقْتَهِنْ فِي الحَبِلْ ... سَاعَتِنْ النِّشْفَنْ لِقِيتِنْ مَسَوِّاتَلّهِنْ نَفُو نَفُو... وَلَّعْتَ المَكْوَة وبِقِيت أكْوِي فِيهِنْ وأطَبِّقْ .. نَامَنْ بِقَنْ بِتل السِِّتَارةاللَّت الشُبَّاكْ ... كَانْ مَا المَرَأة جَاتْ قَلَعَتْ المَكوَة مِن إيدِي .. كُتْ تَلقَانِي بَارِكْ فِيهِنْ لا أسَّعْ ... جَاتْ الجُمعَة , مَشَيتْ صَلّيتْ جَنْبَ نَاسْ الحَلَقَة هِنَاكْ , فِشَانْ مَافِي زول يَصْبُقْنِي ... صَبَقْتَهُنْ كُلَّهُنْ ... بَعَدْ مَا إتْلَمُّوا وجُوا وَكُل زول قَعَد فِي بَكَانُو .. أنَا مَشَيتْ إتْفَرْجَخْتَ لُنْ فِي بَكَان الشَّيخْ اللَّيلُنْ ...مَا قَالوا لِي شِي ... أهَا بِقُوا يَقْرُوا ...عَايَنْتَ كَدِي لِقِيتْ الشَّيخْ مَاسِكْ المَصْحَفْ بى إيد وَاحْدِي ..ومِنْتَكِي بَالتَّانِي فُوقْ كُرَاعُو .. حَتّى أنَا سَوَّيت بِتْلُو ... قَبَّالْ الدُور مَا يَجِينِي بى نَفَرينْ ولاّ تَلاتِي كَدِي ... الشَّيخْ قَال للزول لَلْبِيَقْرأ دَا .. جِييييبْ الغُنَّة ... أَنَا بِقِيتْ أَسَوِّي يَا رَبِّي الغُنَّة دِي جِنِسَها شِنِي ..؟ أعَايِنْ لَهَا فِي المَصْحَف دَار أَعَرِفْ بَكَانَهَا ويين مَانِي شَايِفْ شِيْ ..!! تَانِي بَعَد شِوَيْيِّ قَال لُو : قَلْقِلْ الدَّاااااالْ .. جِيييييييبْ القَلْقَلَه .... قُلْتَ أَنَا كَانْ كَدِي وِكِرْتَ لِي وَكَرَه مَا يَعَلَمْ بَهَا إلاَّ الله , أخَدْ لُو صَنَّة .. وقَال لُو : أدْغِمْ المِيييييمْ فِي البَاء , أنَا بِقِيتْ بِتْل الأطْرَشْ فِي الزَفَّة.. بِقَى يَقرَأ البَعَدُو .. الشَّيخْ قَالْ لُو : دِي عَلامَة الوَقْف اللاّزِم .. لازِم تَقِيفْ .. آ بَعَرفُو .. جِيييييبْ المَدْ الوَاجِبْ ... بِقِيتْ أبْلَعْ فِي رِيقِي ... عِرِقْتَ آ زول ... وأَنَا الدُور لي اللَّيلِي مَا جَانِي .. المَصْحَفْ كَانْ دَار يِتْمَلِصْ مِن إيدَيْ .. عَرْقَانَاااااتْ .. , عِلاّ مَسَحْتَهِنْ فِي جَلاَّبِيتِي وَمَسَكْتُو تَانِي .. بى إيدَيّ الإتْنِينْ ... عِرِفتَ الشَّيخْ دَا خَنَسِيهُو دَا كان مُو لى عَدِيلِيْ شِيْ … لابِدْ لِي أَتَارِيهُو..وَكِتْ القَاعِدْ جَنْبِي بِقَى يَقْرَأ .. قَررررربْتَ أَقُولْ لَهُنْ أَنَا مَاشِي أَهَلِي ..قَريتْ لَهُنْ آ زول الفِِيهَا النَصِيبْ .. وقَالُوا لِي دَار نَبْدا نَعِلِّمَكْ شِوَيِّيْ شِوَيِّيْ .. قُتْ لَهُنْ سَمِحْ … أَوَّلْ شِي إنْتَ حَرْفَ القَافْ قَاعْ تَنْطُقُو بِتْلَ الغَينْ , قُتْ لَهُنْ أَهَا .. ومَا قَاعْ تَطَلِّعْ لِسَانَكْ فِي حَرْفَ الظَّاء و الثَّاء والذَّال …دَحِينْ إِنْدَرَّبْ عَلَيهِنْ .. مَشيتْ عِنْدَ أَهَلِي دَخَلْ فِي الصَّالٌونْ أقعُدْ وأَقُومْ أَسَوِّي فِي إِقْْْْْقْقْ ..أَقْقْقْ …إِقْقْقْ .. البُطَانْ سِمْعُونِي جَرُوا حَدَّسُوا أُمَّهُنْ قَالوا لَهَا تَعَالِي شُوفِي أبُوي يَحَاكِي فِي حِسَّ القَعُونْجَه … حَلَفَتْ وَقَسَمَتْ قَافَ الجِّنْ دِي مَا تَجِي مَعَاي .. نَامَنْ مَسَكَنِّي اللُّوَزْ … بِقِيتْ أَعَجِنْ فِي العَطْرُونْ بالمِلِح وألتَخْ فِي حَلْقِي … قُلتَ كَدِي اللَّخَلِّيهَا وأشُوف البَاقَاتْ وأجِيهَا رَاجِعْ فِي النِّهَايِّي .. مَشَيتْ وَقَفْ قَبَلْ المِرايِّيْ وأمْرُقْ فِي لِسَانِي , إِنْدَرَّبْ يَعْنِي … ثَاااااء … ظَااااااء … ذَااااااااال … تَااانِي البُطَانْ جوا يِتْلَبَّدُوا لِي … المَرَّةْ دِي قَالُوا لى أُمَّهُنْ , أبُوي بِقَى يَعَاوِجْ لى رَقَبْتُو فِي المِرَايِّيْ … قَالَتْ لَهُنْ أبُوكُنْ ألأيَّام دِي مَاهُو بَرَاهُو .. آ بَعَرِفُنْ النَّاسْ دَيلْ قَاعْ يَعَلِّمُوا فِيهُو فِي شُنُو …؟ أَخَدْتَ لِي مِنَّهُنْ شِرِيدَه كَدِي .. شَالُوا مَصَاحِفُنْ وجُونِي عِنْدَ أَهَلَيْ … عِلاّ آ زول والله بَرَكَة الجُونِي .. أسَّعْ المَدِيحْ زَااااتُو بِقِيتْ أَغَنِّنُو. __________________

07-29-2010, 07:29 AM

أبو الحُسين

شباب الميرغني

رد: أبوي يحاكي في القعويِي

أنا : أبو الحُسين

سجل معنا لتتمتع بهذه الخاصية

اقتباس : المشاركة الأصلية كتبت بواسطة عبد العظيم الطاهر [ مشاهدة المشاركة ]


	قُلتَ كَدِي اللَّخَلِّيهَا وأشُوف البَاقَاتْ وأجِيهَا رَاجِعْ فِي النِّهَايِّي .. مَشَيتْ وَقَفْ قَبَلْ المِرايِّيْ وأمْرُقْ فِي لِسَانِي , إِنْدَرَّبْ يَعْنِي … ثَاااااء … ظَااااااء … ذَااااااااال … تَااانِي البُطَانْ جوا يِتْلَبَّدُوا لِي … المَرَّةْ دِي قَالُوا لى أُمَّهُنْ , أبُوي بِقَى يَعَاوِجْ لى رَقَبْتُو فِي المِرَايِّيْ … قَالَتْ لَهُنْ أبُوكُنْ ألأيَّام دِي مَاهُو بَرَاهُو .. آ بَعَرِفُنْ النَّاسْ دَيلْ قَاعْ يَعَلِّمُوا فِيهُو فِي شُنُو …؟ __________________

عبد العظيم الطاهر يا صديقي المُبدع... ليك وحشة قدُر من هِني لا عندك في جدة أُم جداداً محمر...

يعلم الله اليوم الخميس جيت المكتب بدرياً دُغُش عندي شغل نهاية شهر قُلت أخلِّصُو أها فتحت قصتك لامِن إنتهيت منها مواعيد الدوام الرسمي جات... الشكية لله!!! نقرتين لعرض الصورة في صفحة مستقلة

مرة واحد صاحبي شديد من أولادنا... قُوم خطب ليهو بتاً قريبتاً ليهو شهادة عربية (تِرْبَات سعودية صُرُف)... قال لي أكتر حاجة قاعدة تغَلِّبني معاها هي التعامل مع حروف الذال والثاء... قال لي هِي تمرُق لسانها ياااااااااحلاتُو بس طِرِيف كدي... وقال لي تعال شوف يومي الداير أحاكيها... حاولت أمرُق لساني إتْمَدَّ زي راس (أبْ دِرِينْقَة - أبو القَدَح) طويييييييل قدامي... من اليوم داك بقيت إن بقى دايِرْلُو غَمَتِي لا جُوَّة أغَمتُو!!! نقرتين لعرض الصورة في صفحة مستقلة

اقتباس : المشاركة الأصلية كتبت بواسطة عبد العظيم الطاهر [ مشاهدة المشاركة ]


	ظَهَّرْتَهِنْ آ زول بى قَلَمْ اللِّيلْ كُوبْيَا ...وعَلَّقْتَهِنْ فِي الحَبِلْ ... سَاعَتِنْ النِّشْفَنْ لِقِيتِنْ مَسَوِّاتَلّهِنْ نَفُو نَفُو... وَلَّعْتَ المَكْوَة وبِقِيت أكْوِي فِيهِنْ وأطَبِّقْ .. نَامَنْ بِقَنْ بِتل السِِّتَارةاللَّت الشُبَّاكْ ... كَانْ مَا المَرَأة جَاتْ قَلَعَتْ المَكوَة مِن إيدِي .. كُتْ تَلقَانِي بَارِكْ فِيهِنْ لا أسَّعْ ... __________________

عليك الله يا عبدُو يا صاحبي... هسع النَّفُو نَفُو دي يترجمُوها كيفِن؟؟؟ نقرتين لعرض الصورة في صفحة مستقلة

عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا

07-30-2010, 02:30 PM	#3
رنا كمال	رد: أبوي يحاكي في القَعُويِي - قصة أنا : رنا كمال سجل معنا لتتمتع بهذه الخاصية مَشيتْ عِنْدَ أَهَلِي دَخَلْ فِي الصَّالٌونْ أقعُدْ وأَقُومْ أَسَوِّي فِي إِقْْْْْقْقْ ..أَقْقْقْ …إِقْقْقْ .. البُطَانْ سِمْعُونِي جَرُوا حَدَّسُوا أُمَّهُنْ قَالوا لَهَا تَعَالِي شُوفِي أبُوي يَحَاكِي فِي حِسَّ القَعُونْجَه ماشاء الله يا اخ عبد العظيم على سردك الممتع والله انا من امبارح ممكن قريت القصة دي خمسة مرات وكلما اصل نقطة وقوفك في الصالون مع حرق القاف اتخيل منظر اولادك وهم متابعنك بالشبابيك شكرا يا رايع على المساحة الفرائحية

07-30-2010, 07:50 PM	#4
علي الخليفة عمر مُشرف الختمية أُون لاين	رد: أبوي يحاكي في القَعُويِي - قصة أنا : علي الخليفة عمر سجل معنا لتتمتع بهذه الخاصية يا سلام والله يا عمنا ..... انا بصراحه كدا قعت للقصه ده كتير علشان افهما.... ده مشكلتنا البعيدين عن بلدنا ..... الله يجازي السبب ...... والله طولنا من الكلام السمح ده .... بارك الله فيك يا مولانا على هذه القصه الجميله

07-31-2010, 02:39 AM

bet alkhalifa

المُراقب العام

bet alkhalifa is on a distinguished road

رد: أبوي يحاكي في القَعُويِي - قصة

أنا : bet alkhalifa

سجل معنا لتتمتع بهذه الخاصية


	جِييييبْ الغُنَّة ... أَنَا بِقِيتْ أَسَوِّي يَا رَبِّي الغُنَّة دِي جِنِسَها شِنِي ..؟ أعَايِنْ لَهَا فِي المَصْحَف دَار أَعَرِفْ بَكَانَهَا ويين مَانِي شَايِفْ شِيْ ..!! تَانِي بَعَد شِوَيْيِّ قَال لُو : قَلْقِلْ الدَّاااااالْ .. جِيييييييبْ القَلْقَلَه .... قُلْتَ أَنَا كَانْ كَدِي وِكِرْتَ لِي وَكَرَه مَا يَعَلَمْ بَهَا إلاَّ الله , أخَدْ لُو صَنَّة .. وقَال لُو : أدْغِمْ المِيييييمْ فِي البَاء , أنَا بِقِيتْ بِتْل الأطْرَشْ فِي الزَفَّة.. بِقَى يَقرَأ البَعَدُو .. الشَّيخْ قَالْ لُو : دِي عَلامَة الوَقْف اللاّزِم .. لازِم تَقِيفْ ..

لك الشكر الجزيل عبد العظيم الطاهر على هذا القصة الابداع من كلام اهلى الشوايقة

عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا

08-04-2010, 04:50 PM

اسراء معتصم

مُشرف المنتدى العام

رد: أبوي يحاكي في القَعُويِي - قصة

أنا : اسراء معتصم

سجل معنا لتتمتع بهذه الخاصية

والله يا عم عبد العظيم ضحكتني من جوه قلبي . نقرتين لعرض الصورة في صفحة مستقلة

وين انت وحياة الله مشتهنك

عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا

08-20-2011, 01:45 PM	#7
أبو الحُسين شباب الميرغني	رد: أبوي يحاكي في القَعُويِي - قصة أنا : أبو الحُسين سجل معنا لتتمتع بهذه الخاصية اقتباس : المشاركة الأصلية كتبت بواسطة اسراء معتصم [ مشاهدة المشاركة ] والله يا عم عبد العظيم ضحكتني من جوه قلبي . وين انت وحياة الله مشتهنك المتواجدون الآن: 30 (الأعضاء 4 والزوار 26) أكبر تواجد بالمنتدى كان: 121 بتاريخ 02-04-2011 الساعة 07:51 PM أبو الحُسينعمار محمد+عبد العظيم الطاهرإبراهيم ميرغني _____________ يا هلا بي عودتك الأديب القاص عبد العظيم الطاهر... وعشان ما يزعل مننا يا بتنا إسراء... لا تعايني لي مفرداتُو القديمي دي... الشي دا شباب الزينين... يادُوب قطارُو متحرك علي الخمسة وتلاتين قالت عمو عبد العظيم قالت

08-20-2011, 03:14 PM	#8
عبد العظيم الطاهر	رد: أبوي يحاكي في القَعُويِي - قصة أنا : عبد العظيم الطاهر سجل معنا لتتمتع بهذه الخاصية اقتباس : المشاركة الأصلية كتبت بواسطة أبو الحُسين [ مشاهدة المشاركة ] المتواجدون الآن: 30 (الأعضاء 4 والزوار 26) أكبر تواجد بالمنتدى كان: 121 بتاريخ 02-04-2011 الساعة 07:51 PM أبو الحُسينعمار محمد+عبد العظيم الطاهرإبراهيم ميرغني _____________ يا هلا بي عودتك الأديب القاص عبد العظيم الطاهر... وعشان ما يزعل مننا يا بتنا إسراء... لا تعايني لي مفرداتُو القديمي دي... الشي دا شباب الزينين... يادُوب قطارُو متحرك علي الخمسة وتلاتين قالت عمو عبد العظيم قالت ابوالحسين ... كيفنك ... هازول الأيام دي ( عامل لي نيو لوك ) كدي عاجباني بالحيل سويتها ونسيت نفسي ... جيت داخل من الشغل وكت تفتح باب الحوش اللليلنا ( قصدي الشقة يعني ) تلاقيك مراية في وشك طوالي ... وكت شفت نفسي في المرايي إتهجم قلت يا ربي ده منو الجايي يدخل معاي عند أهلي ده .؟؟؟؟

01-29-2014, 03:29 PM	#9
عبد العظيم الطاهر	رد: أبوي يحاكي في القَعُويِي - قصة أنا : عبد العظيم الطاهر سجل معنا لتتمتع بهذه الخاصية يا حليل الزمن يا صحابي .. ويا فردتي أبو الحسين الزين .... شوف الحديس ده أسع ليهو كم من كتبناهو ..؟؟؟ يعلم الله رب العباد من زمن ( النيو لوك ) داك و لا أسع الوش يا حليلو بقى زي كيس النايلو الضارباهو الشمش قرقرقرققررقرقرققر

الذين يشاهدون محتوى الموضوع الآن : 1 ( الأعضاء 0 والزوار 1)