التُوم هجُو الضكران، الدحفس البُطان!!!
 

خارج النص
التُوم هجُو الضكران، الدحفس البُطان!!!
جمال أحمد الحسن – الرياض 7 ديسمبر 2021م

أتذكَّر ونحن زمااااان في المدرسة الإبتدائية.. مدرستنا كانت مُختلطة.. كان الزمن داك في نُوعين من (الشَكَلْ).. شَكْلَة الوِلادْ وشَكْلَة البنات.. الأُولى كانت دائماً تكون بموعد من نُوعية: نتلاقى بعدين في خُور الحسن، في كرُو ود منصُوري، في خُور البير، في كرُو أرباب، وتنتهي بي بُنية وشلاليت ومُصارعة وفي النهاية مُحاجزة وكدي.. أما التانية فكانت بدايتها ونهايتها الفصل ولو بالغت المزيرة ولو كمان تطوَّرت خالص تصل تحت صهريج الموية قدَّام باب المدرسة.. والنُوعية دي تنتهي بي: (يا شينِي).. (يا قبيحي).. (يا عُولاقة).. وأخطر حاجة ممكن تصل ليها: (أُو أُو أُووووهْ مع مدَّة الخشيم لا قِدَّام كدي ومعاها تكالُب للخمس أصابع في وجه البنت التانية)!!!
أها الوقَع على القيادي في (قحت المؤتمر الشعبي)، التوم هجُو حفيد السادة اليعقُوباب ونائب رئيس الجبهة الثورية، من بعض كُتَّاب (قحت المؤتمر الوطني) ياهُو زي شكلة البنات دي!!!
بدَل يناقشُوا الراجل في أفكاره وآرائه المبذولة عبر دواوينهم المصطنعة (مجلس شركاء الدم مثلاً) وليه عاوز يوسِّع ماعُون المشاركة وليه عاوز (حمدوك يطلِّع بيان بحل الحكومة).. قامُوا طلقُوا نشطائهم و(بُطَانُنْ) عبر الأسافير شبكُوهُو ليك: الشين، العُولاق، اللصقة، الفعلتك والتركتك، وفي واحدين مشُوا أكتر من البنات حقاتنا ديلك، واحد قال ليهُو في زول يسمِّي نفسُو (هجُو) تخيَّلُوا بالله؟؟!! وحكمة الله الحملة دي تكَاكِي في الميديا وهُو شغاااااااال وحسَّابتُو بتحسِب.. وفي غمرة نشوتهم بالإساءات و(المُهايَطة) دي زحَّاهُم (الأربعة) برَّاااااااحة، وللأسف صاحبت هذه الإزاحة دخُول بعضهم السجُون!!!
الشاهِد في ذلك.. مثلما نُريد أن نوجِّه ونؤهِّل ساستنا ديل كيف يحكمُون، نريدهم أيضاً أن يتعلمُون فنون المعارضة.. وذلك بالإبتعاد قدر الإمكان عن شخصنة الإمور العامة.. فالوطن ملك للجميع على الشيوع.. والشعب دا واعي جداً ويعرف جيداً الغث من السمين.. يعني بالدارجي كدي.. مواطِن عادي يهمُّوا شنو بالسياسي يكُون سمح سماحة جمل الطين ولَّة شين شناة مُرَّة مادام هُو عاطل وفاشل وما قادر يوفِّر ليهُو أبسط مُعينات الحياة، أُكْلُو واشرَبُو، تعليم، صحة، أمن وأمان؟؟!!!

خارج النص
كتبنا كثيراً عن القروش والمبالغ الكبيرة التي تُصرَف في شراء الذِمَم وفي الإستقطاب السياسي من لدُن أيام البشير/عوض الجاز وإلى يوم الناس هذا، فلو وُجِّهَت هذه المبالغ المُهدرة للتنمية الحقيقية في مصلحة المواطن لكانت فائدتها أعظم.. ولجَنَى السياسي المُبعزِق للقروش دي محبة ملايين من الناس ممَّن تصلهم هذه المصلحة في شكل مُستشفى أو شفخانة أو مدرسة أو بئر ماء بدلاً من أن تستقِر في جيب (سياسي أو قط سمين) واحد يبيعك في أقرب مُنعطف يقابلُو في الحياة، اللَّهُم هل بلَّغت.. اللَّهُم فاشهَد؟؟!!!
...
..
.
ويظل سؤالنا الدائم.. البلد دي السايقها منووووووو؟؟؟
+ خبر الجماعة القبضوهم في مطار الخرطوم مهرِّبين (الذهب) برَّة شنو؟؟؟
++ لجنة التحقيق المُشتركة مع (الآي بي إف) في حادثة إغتيال حمدوك الفاشلة وصلت لي وين؟؟؟
وأخيراً.. القروش الضايْعَة بين المالية ولجنة التمكين، إتعرفت كم وعند منو ولَّة لسَّع؟؟!!!

#لاحلسوىالوفاقالوطني_الشامل
#العدالة_نوووور
#الردة_مستحيلة
#معاًلمحاربةسوقة_الخلا
#الوعي_مهم
#الحريةلمعتقليالرأي
#جمالأحمدالحسن