منتديات الختمية

منتديات الختمية (https://www.khatmiya.com/vb/index.php)
-   المنتدى العام (https://www.khatmiya.com/vb/forumdisplay.php?f=2)
-   -   ذكريات المولد النبوي بالقرير - بقلم عمر ترتوري (https://www.khatmiya.com/vb/showthread.php?t=8862)

رنا كمال 10-30-2019 07:57 PM

ذكريات المولد النبوي بالقرير - بقلم عمر ترتوري
 
*من ذاكرة عمر محمد على ترتورى عن المولد النبوى فى امدرمان*
__________
لفت انتباهي قبل قليل برنامج مطول عن المولد النبوى الشريف في احدى القنوات الفضائيه ومباشرة تذكرت اول إحتفال للمولد حضرته في ام درمان وانا درفون صغووير لسع ما قام لى شنب ،،،،،،
الحقيقه عندنا في البلد والبلد أعنى قريتنا*{ *الصفا* بالقرير ،، الشماليه}*
كنا نحتفل بالمولد بطريقه خاصه ولكن ليس كالإحتفالات والمهرجانات الشافتا عينى عيان بيان فى حوش الخليفه بأمدرمان*،،،،،،
طبعاً في البلد ليلة *١٢ ربيع الاول* أهلنا كلهم حريم ورجال صغار وكبار يتجمعوا في ساحة جامع شيخنا عثمان ود الحاج ويضبحوا التور الغليد ومعاه كبشين كبار .. ويقروا الإنشاد الدينى للمولد من بدايتو*
لامن يختموه ب :
*وأختم قولي بالصلاة معظما فيا ربنا صلي وبارك وسلما.*
*على المصطفي والآل والصحب دائما .. صلاة تفوق المسك عطرا مفخما .*
يطيب بها كل الوجود ويتلألأ*
*اللهم صلي وسلم على حبيب الله،،،،*
بعدها نتعشى *بالفته* يملوا الصحن الكبير عدة حروف كسره من تحت و فوقا من فوق رغيف يقطعوه صغار ويرشوه بالسليقه ومشتت فوقو الرز المصرى الأبيض مع اللحم المحمر ،،،،
وبعد العشاء يدقو الطار و المديح يدور ،، وكان المداحين يرحمهم الله على ود سيدإحمد ود الحاج ،، والحسانى وود عبد الله وود كروق ،،، كانو يمدحوا وصوتهم حلو وعالى يجيب الطاش كرماً للنبى عليه الصلاة والسلام لاعن نص الليل...!
هذا كان إحتفالنا بالمولد التبوى ،، أما إحتفال امدرمان الشافتو عينى ما هو قول قايل كان حاجه عجيبه ..اتذكره لا يوم الليلى ...
أكرمنى الله بان اسافر من البلد برفقة حبوبتى نفيسه بت إحمد ود موسى ود عيساوى ولحسن الحظ كان فى بداية *شهر ربيع* ومجرد وصولى للعباسيه بأمدرمان محل سكن خالى محمد خير ،، مباشرة فرحونى ولاد خالى الامدرمانيين و ادوني فكرة عامة عن المولد وإحتفالاته فى امدرمان ،، وبالفعل جهزت نفسى و لبست بنطلونى الكرمبلين الشارلستون زى كيس البوندقيه وقميصى المخطط بالاحمر والأبيض *تحرمنى منك* وساعتى الرومر وطلعت فى كامل اناقتى و بديناها معاهم بالزفة وكانت تبارك الله زفه عجيبه مشيت كدارى بي كرعي مع الموكب العجيب على انغام سلاح الموسيقى و الناس صغار وكبار حريم ورجال فرحانين يَكَبِّرُو ويَهلِلُو و شوف عيني الخيول تتماوج يمين ويسار مع اهازيج النوبة والنقاره والنحاس وكمان رجال الصوفية لابسين الاخضر المرقع بالاحمر والحريم الامدرمانيات بي شلوخن المطارق{مشلخات لا تحت}*يزغردن والناس كلهم فرحانين المهم مشينا معاهم انا وولاد خالي عبدالله وعبد الرحمن واصحابهم ولاد امدرمان المتفلهمين،،، وكلهم كانو يعاينو لي لأني مندهش *قروي وفكوه في المدينة*
وطبعاً الزفّة عجاجها لاوي وماشين بي كرعينا معاهم من العرضة مروراً بشارع الأربعين الى ان وصلنا ساحة مسجد الخليفة وهناك والله شفت العجب العجاب البيارق والاعلام واللمبات الملونه احمر وأصفر وأخضر شخالب شخالب معلقات في كل مكان*،،،،،
وزحمة شديده وطبعاً الزحمه فيها الرحمه وهناك الشئ الما شفتو في بلدنا شفتو في ميدان الخليفة البنات السميحات لابسات احسن لبس {موضه ساااكت} والحريم لابسات التياب العالات المزركشه ومسريحات شعورهن تسريحات تفتح النفس وتسر الناظرين شيتن قجيجه وشيتن لاوراء وشيتن ضفاير والشعرن قصار لابسات الباروكات،،،، غايتو حكايات عجيبة خلاص ،،،وشوف عيني حلاوة المولد الما عندنا في بلدنا شفتها بجميع انواعها الفولية والسمسمية وحلاوة لكوم ،،، اولاد خالى سايقني زي العميان ويورونى : قالوا لي دي *خيمة الانصار* شفتهن بى جلالايبهم المقلوبه وطواقيهم الطويلى وكمان قالوا لى : دي *خيمة الحكومة* وشفت بعض الضباط الكبار وكنت مفتكر نميرى معاهم ،،،، و تانى مشو بي لي قدام قالو لي دي *خيمة الختمية* بلا اشوف لك ناسنا وأهلنا بي ذاتن وصفاتن منهم الساكنين في ام بده التوم كروق والنخاري و ناس العباسيه عمنا عوض الحسين واخوه محمد خير ابو جاره واعمامنا التيمان حسن وحسين شبو و عمنا عمر ود عثمان ود الحاج و حسن حسين وكل الخلفاء المريدين للختمية والحقيقة انبهرت جداً ،،،،حقيقة كانت يوم وليله جميله ما بنساها ابداً ،،، خصوصاً المحتفى به هو خير اهل الارض ولكن الإحتفال به في ام درمان وخصوصاً في ميدان الخليفة حاجة روعه .
*عمر ترتورى*


الساعة الآن 12:57 PM

Powered by vBulletin® Copyright ©2000 - 2024, Jelsoft Enterprises Ltd.
دعم وتطوير نواف كلك غلا