منتديات الختمية

منتديات الختمية (https://www.khatmiya.com/vb/index.php)
-   المنتدى العام (https://www.khatmiya.com/vb/forumdisplay.php?f=2)
-   -   الكُعُوبِيِّي (4)!!! (https://www.khatmiya.com/vb/showthread.php?t=8816)

أبو الحُسين 12-11-2018 09:44 AM

الكُعُوبِيِّي (4)!!!
 
الكُعُوبِيِّي (4)!
أرِيتَا بِدعة السرُور التدخِّل صاحبها جنَّة الحُور!!!
بقلم: جمال أحمد الحسن – الرياض 10 ديسمبر 2018م

قبُل ما ندخُل علِي بِدْعَة السِرُور دي... كدي النراجع تعريف البدعة من باب المُذاكرة بس...
تعريف البدعة لغوياً، العليهُو عُلماء الوسطية الربانيين زي سلطان العُلماء العز بن عبد السلام وابن حجر العسقلاني (رضي الله عنهما) وغيرهُم، هي بي بساطة كدي الشي المُستحدَث الما عندُو مثال سابِق من لا ورا...
أما اصطلاحاً فأحسن تعريف ليها هُو... الشي المُستحدَث وما عندُو أصل في الشرع...
وقامُوا طوَّالي (جزاهُم الكريم خير) قسَّمُوها بالتقسيم الخُماسي المعروف...
حرام – واجب – مندُوب – مكروه – مُباح
وعاد فصَّل فيها العِز بن عبد السلام وأجااااااد حلالي... ودحَضْ كلام الناس الكَعَبِين اليقُولُولَك (كُل) بدعة ضلالة وهي وصاحبها في النار!!! محاولين إهلاَك أكبَر قدْر ممكن من المُبتدعة المساكين قديماً وحديثاً وإدخالَهُم في نار الجحيم!!!
بدعتنا السمحَة دي الدخَّلت صاحبها الجنة والقُلنا عليها (أريتَا بدعَة السرور)، أها دي حصلت في زمن النبي صلى الله عليه وآله وسلم... إبتدعها صحابي سااااااااكت كدي...
قصتُو شنو الصحابي دا؟؟
جاء في الحديث الذي رواه سيدنا الإمام أبو بكر البيهقِي رضي الله عنه أن رجلاً من الأنصار.. كان إماماً لمسجدِ قُبا بالمدينة المُنوَّرة...
أها... كان كُلَّما يصلي بالناس... يقرأ سُورة الفاتحة ووراها طوالي يقرأ سُورة الإخلاص (من عندُو كدي إبتدعها من راسُو دا) حتى بعد داك يقرأ سُورة تاني معاها!!! ودا طبعاً فات أهلنا الكُبار زمان الكانُوا يقرُوا سُورة الإخلاص في كل ركعات التراويح، لكن كان قاعْ يقرُوها براها!!! لامِنْ جُو الناس الكعبين ديلك قالُو بدعة!!!
أها الجماعة القاعْ يصلُو وراهُو قالُولُو الكلام دا مُو ياهُو... يا تقرأ الإخلاص براها... يا كمان تقرأ السُورة التاني المعاها وتخلي الإخلاص... ودي ياها الصلاة العَلَّمْنَا ليها الحبيب المُصطفى صلى الله عليه وآله وسلم...
قام قال ليهُنْ والله يا اخواني أنا معاكم تَبْ... لكن دي ياها صلاتِي العاجباني... كان دايْرِنَّها خلاص... وكان ماكُن دايْرِنَّها، كمان شُوفُولْكُن إمام غيري!!!
الجماعة أُسقِط في إيدُن... الظاهر عليهُو مافي أفضَل منُّو شي... سكَتُو قِبْلُوبُو.. لكن مشُو رفعُوا أمرُو للحبيب المُصطفى صلى الله عليه وآله وسلم...
الحبيب جابُو وسألُو من الحاصل دا...
ردَّ عليهُو والله يا سيدي يا رسُول الله... أنا بالجد قاعْ أصليبُن بالطريقة دي... وبي عُذري... نعم يا سيدي إنت علَّمتنا طريقة الصلاة في الركعتين الأوائل (الفاتحة ومعاها سُورة بس) لكن.. أنا قاعْ أحِب السُورة دي كدي لله وفي الله عشان كدي أول شي أجيبها هِي حتى أجِيبْلِي معاها سُورة تاني!!!
قام الرحمة المُهداة قال ليهُو شنو؟؟؟
لا قال ليهُو دي جبتها من وين آ المُبتدِع الضال الفَعَلْتَك والتَرَكْتَكْ؟؟؟
ولا قال ليهُو دي بدعة ضلال وانت وياها الإتنين في النار!!!
قال ليهُو بكُل لُطْف وحِنِّيَّة.. حُبَّك ليهَا دا دخَّلَك الجنة... هَنِيَّالَك، هَنِيَّالَك، وهَنِيَّالْنَا نحن كمَان بحُبَّنا للإخلاص وأحبابها من المُخلصين...
اللهم صلِّي وسلم على قِبلَة تجليَّاتك الربانية.. محل نظرك من الوجُود عالي الشان... كتاب أسرارِك المنطوية الحقية العلمية.. مظهر الرحمة من حضرتها ومجلى إسمها الرحمن... وعلى آله وصحبه ما استقامت الملَّة الحنيفة.. وما ترجم بلسان الشريعة والحقيقة ترجُمان...
بالجد من يحاوِل تسليط سيف البِدعَة على رقَاب أهل لا إله إلا الله سيدنا محمد رسول الله فهُو كَعَبْ، كَعَبْ، كُل همُّو في الدنيا دي ومُنَى عينُو أن يرَى (كل) الناس، (كل) الناس في نار الجحيم... ولا يدْرِي المِسكين بأن رحمة الله وسعَت (كُل) شيء (كُل) شيئ...
.
.
.
تُنَال المعرفَة بثلاثٍ: بالنظر في الإمور كيف دبَّرها، وفي المقادير كيف قدَّرَها وفي الخلائق كيف خلقها...
# ذا النُون المصري رضي الله عنه


الساعة الآن 03:03 PM

Powered by vBulletin® Copyright ©2000 - 2024, Jelsoft Enterprises Ltd.
دعم وتطوير نواف كلك غلا