منتديات الختمية

منتديات الختمية (https://www.khatmiya.com/vb/index.php)
-   المنتدى العام (https://www.khatmiya.com/vb/forumdisplay.php?f=2)
-   -   التنطُّع (5) بقلم: جمال أحمد الحسن (https://www.khatmiya.com/vb/showthread.php?t=8818)

أبو الحُسين 01-03-2019 02:58 PM

التنطُّع (5) بقلم: جمال أحمد الحسن
 
*التَنَطُّع (5)*
بقلم: جمال أحمد الحسن – 3 يناير 2019م

قبُل يُومين، إتَّصل علي أحد الإخوة المُتابعين لمقالات التنطُّع وحكى لي القصة العظيمة دي...
قال لي وهُو صغيِّر كان متابع أبوهُو وأحد أعمامُو قاعْ يشربُو (البَقَنِيِّي) ومرَّة مرَّة كدي العَرَقِي!
أها قال لي مرة كَدِي جرى الحوار دا بيني وبين أبُويْ...
الولد: إنت آ يابة عمي فلان دا قَطِعْ شَكْ حا يدخُل النار!!!
الوالد: ليه يا ولدي؟؟ عمك دا مُواصل للرحم ومُقيم لي صلواتُو ومن أهل الخير في البلد...
الولد: عشان قاعْ يشرَب العرقِي!!! والجَنَا يبقى لي نجيض ماهُو ساهِل شِي... عاوز يوَصِّل النصيحة دي بطريقة ديبلوماسية لي أبُوهُو (الشَرَبَنْجِي) برضُو!!!
الوالد: "وهنا على طُول ركَّب مكنة مُربِّي وفي نفس الوقت داعية إسلامي وسطي" لكن يا ولدي الجنة والنار ديل مُوووووووو في ايد زُول شي... الجنة والنار ديل بيد رب العالمين بس...
وأصلاً الله دا وهُو اللطيف بي عبادُو ما خلق عبادُو ديل عشان يعذِّبُن... خلقُن عشان يعبدُوهُو حق عبادته ويدخِّلُن الجنة وكان كمان قصَّرُو في العبادي دي يتولاَّهم بي رحمتُو... وعشان كدي سمَّى نفسُو الرحمن الرحيم...
ويا وَلَدِي عاوز أدِّيك نصيحة لي عُمْرَك أصلاً ذنب بينك وبين اللطيف الخبير دا لا تلاوِزْ منو شي ولا يبقالك مشغولية وهاجس.. يغفِر ويرحَم ويتوَلَّى كمان... لكن يا ولدي بس أخَتَى (أذِيَّة الناس)... دي ياهَا المااااااااب يسامح فيها شي!!!
فلَوْ نقلنا المشهد الآن إلى أيِّ بيت في الزمن السمح داك... نلقى الآتي:
نادِر جداً ما تلقى بينُنْ حرامِي يسرُق وياكُل حق الناس من غير حق!!!
ونادر جداً ما تلقى إنسان همُّوا الترَفُّع على جيرانُو البُسطاء مهما بلغ هُو من الغِنى ويُسر الحال!!
ونادر جداً ما تلقى شخص يعايِنْ للفي إيد جارُوا مهما بلغ به الحسد مبلغا!!!
ونادر جداً ما تلقى واحد جابْلُو شوية فواكه معاهُو من سُوق كريمة أكلُوهَا براهُن هُو وولادُو بدُون ما يضوِّقُو جيرانُنْ!!
*ثم*...
مستحِيلْ جداً أن تجد إنسان يتلذَّذ بي مَضَرَّة خلق الله باتلاف زرعهم (مثلاً) أو كسر جدولُن أو قطِع حبل الغسيل الزمان كان رابطِنُّو بي سِلِكْ ورامِنُّو ورا حيطة الحُوش!!!
عشان كدي كانت البركة نازْلِي عليهُم في كل شي... أعمارُن، زراعتُن، جناهُنْ، قروشُن، عيشَتُن حتى دوابُن وأرِضُن كانت مبروكة...


*فائدة:*
سيدنا النبي صلى الله عليه وآله وسلم كان في لحظة تجلِّي وسط أصحابُو...
قال لهُم: من قال لا إله إلا الله سيدنا محمد رسول الله دخل الجَنَّة...
قام سيدنا أبو ذر (وكان حقَّانِي وحَاقَاقْ) قال ليهُو: وإن زَنَى وان سَرَق؟؟؟
ردَّ عليهُو الرحمة المُهداة... وإن زَنَى وإن سرق...
سيدنا أبو ذر يُكرِّر السؤال للمرة الثانية... وإن زنى وان سرق؟؟؟
ويرُد عليه الحبيب... وإن زنى وإن سرق...
تاني يُكرِّر سيدنا أبو ذر السؤال باستغرابٍ أشد... وإن زَنَى وإن سرق يا رسول الله؟؟؟
فرَدَّ عليه الرؤوف الرحيم وعشان يقطع طريق الشك قدَّامُو... وإن زَنَى وإن سرق... رغمَ أنفِ أبي ذر!!!
يقُولُ لي مُحدِّثِي.. أن والده وعمه تاب الله عليهما من الشَرَاب فيما بعد... وبإذن الله تعالى أنهما ومعظم من رحلُوا من جيلهم السمح داك الآن ينعمُون بجنةٍ عرضها السموات والأرض جوار هاديهم وقدوتهم الحبيب المُصطفى صلى الله عليه وآله وسلم في عليين... ليه يا ربي الظن الحسن دا فيهم؟؟؟
لأنهم كانُوا قاعْ يطبِّقُوا الدين المُحمدي السمِحْ... وبالتالي كان ظاهر عليهم سلوك في حياتهم اليومية...
لا يسرقُون... لا يزنون... لا يتباغضُون... لا يغدرُون... لا يكذبون... يصلُون ارحامهم وفيما بينهم يتراحمُون...
حتى بلغت بهم السماحة كانُوا عندما يغرسُون شَتْلَة (نخل) جديدة... يقُولُون مُستعينين بالله ويهبُون ما تحمل من ثمار ل:
المحتاج
والعشمان
والدَنَّاع
والشَحَّاد
وللسرَّاق كمان!!!
رضي الله عنهم وأرضاهم... ونسال الله أن يُوفقنا السير على هُداهم وأن يدخلنا معهم تحت شفاعة سيدنا ومولانا محمد صلى الله عليه وآله وسلم العمومية والخصوصية وأن يرزقنا جواره عالي الجنان... اللهم آمين...
.
.
.
*(ثلاثة ليس معهم غربة: حُسنُ الأدب، كَفُّ الأَذَى ومُجانبةُ الرِّيَب)*...
# *محمد بن سيرين رضي الله عنه*...💝


الساعة الآن 02:36 PM

Powered by vBulletin® Copyright ©2000 - 2024, Jelsoft Enterprises Ltd.
دعم وتطوير نواف كلك غلا