منتديات الختمية

منتديات الختمية (https://www.khatmiya.com/vb/index.php)
-   المنتدى العام (https://www.khatmiya.com/vb/forumdisplay.php?f=2)
-   -   عناية عُلماء السودان مع التحية!!! (https://www.khatmiya.com/vb/showthread.php?t=8834)

أبو الحُسين 07-23-2019 02:49 PM

عناية عُلماء السودان مع التحية!!!
 
عناية عُلماء السودان مع التحية!!!

بقلم جمال أحمد الحسن – الرياض 21 يوليو 2019م...

إلى مشائخنا الكرام ب(هيئة عُلماء السودان)... السلام عليكم ورحمة الله وبركاته...
أرجُوكم منكم التعامُل مع موضوعي دا من باب التذكرة والتنبيه والتناصُح فيما بيننا...
أوَّل حاجة أقُولها ليكم بالواضح كدي وزي ما قال الحاج حميدتي (زمن الغَتْغَتَة والدِسْدِيس إنتهى)... معظم أهلنا في نواحي قطر السودان شايلين في خاطِرُن منَّكُم...
من أيَّام العهد السابق.. وبُعدكم الواضح عن نبضِ الجماهير وحقوقهم ومستحقاتهم!!
يقُولون: كل همكم كان يدُور عن حقوق الحاكم (من وجوب الطاعة في المنشط والمكره) وليس العكس!!
ومن الواجب، بل الأوجب أن يكون إصطفافكم مع شعبكم المطحون وانتم احد مكوناته التي اختصها الله بالعلم والمعرفة فبوَّأكم عليهم سلطاناً مُبينا!!! فكان يجب عليكم النصيحة المُستمرة للحكَّام والحزم والتشديد على مسائل الفساد التي أصبحت السِمَة الغالبة لمعظم قادتنا السابقين...
أها نقُول الحمد لله رب العالمين تراها جات الثورة... وراح النظام بي خيرُو وشرُّو... وتحرَّرْتُو من ضمن الشعب الكان مُرتَهَن ولقى براحُوا...
طيِّب.. نصيحتي ليكم عشان تكفِّرُوا عن يسير مما سبق...
ليه ما تِتْبَنُّوا مشروع: *(السَنِي دي مافي ضحية)*!!!
أيوا بالواضح كدي... تطلعُوا وتقُولُو للشعب السوداني...
والله يا اخواننا... الضحية دي أصلها ماها واجبي... سُنَّة بس...
وبي سُنَّتَها دي... يؤديها الزول القادِر تَب... وعندُو ما يقدر عليها... وبما أننا مالكية والسادة المالكية قالُو (تُسَن) للزول العندُو قروشها ومُو محتاجلها في سنتُو دي... ولو احتاجلها في سنتُو دي... تسقُط عنُّو... وبما إنكم يا شعبنا الطيب المُسالم لا تملكُون ثمنها خليهُو من فائضها.. وهسع قبُل كم يوم دخلت عليكم المدرسة وتجهيزاتها مع احتياجات البيت الكلُو يوم في زيادي دي!!!
دَحِين نسبةً للظرف البتمُر بيهُو البلد اليومين دي... من جُوع وغلاء والقروش في رقبتها دي ماها في... لا تضحُّوا السنِي دي ونحن ذاااااااتنا ماني مضحين معاكم...
تعرف... حا تكُونوا عملتُو أمر عظيم... ربما يذكره لكم التاريخ... وتجدُون الثواب والأجر عليهُو من رب العباد...
فهلاَّ همِّيتُو بالأمر دا؟؟ أرجُو ذلك...
.
.
.
(من نفَّس عن مسلمٍ كُربةً من كُربِ الدنيا نفَّس الله عنه كربةً من كُربِ يوم القيامة، ومن ستر مُسلماً في الدُنيا ستره الله في الدُنيا والآخرة، ومن يسَّر على مُعسرٍ في الدنيا يسَّر الله عليه في الدُنيا والآخرة، والله في عونِ العبدِ ما كان العبدُ في عونِ أخيه)...
*# صدق رسُول الله صلى الله عليه وآله وسلم*...


الساعة الآن 08:41 PM

Powered by vBulletin® Copyright ©2000 - 2024, Jelsoft Enterprises Ltd.
دعم وتطوير نواف كلك غلا