منتديات الختمية - صباحك يابلد

هذه القصيدة وصلتني عبر الواتساب من صديق صدوق ( ساخِر )
بدأها بصباح الإبتسامات - صباحكم عافية .. ولقمة دآآآفية .. عليكُم الله أقرأوها للآخِر من دون مَلَلْ:

صباحك يابلد تعمير ..عَرق عامل .. صِدق تاجر صوت ركشات ودرداقات
كوارو حمير .. صباحك يابلد قرآن ... تلاوة شيخ بعد تكبير وصوت حِيران ..
وستات شاي .. بتاع دكان طاولات عيش وكم أفران ... صباحك ياوطن طائع
وزيت طالع .. صفوف عربات على الإستوب .. وبت بي حشمة لابسة التوب
ولافتة كبيرة في الشارع .. طفل ضائع ومتسول .. خفير للسوق ..
وصوت الطلبة والكمساري واقف فوق .. وشاب حيقوم من المقعد عشان
عمو بخفة وذوق !! نهارك يابلد آذان من الجامع وناس بى جنبو تتسول
وتِتبَول .. بتاع ورنيش يكشكش ... كش .. كش وكم بائع بيتجول ....
وست طعمية تحت الشجرة بعد ضل الضحى إتحول .. وصوت موتر يكورك
ورر..ور..ور وبوكسي قديم بي مية دفرة مادور .. وناس من بدري
فارشة خضار تجيها الكشه بالدفار .. وصوت سمسار يجوط السوق
عشان دينار ... ووسط الدارة زول بَرَآآآآي كلامو كُبار ...

بلد مليانة حواتة .. شباب رائعين .. بلد مليانة همباتة .. مرتزقة وتجار دين ...
بلد مليانة صرافات وشحادين ... بلد موجوعة في ذاتها وناس تائهين ...
بلد مليانة بالطلبة وخريجين ... بلد محتاجة لكل زول ومطاراتها مسطفة
كُل يوم مغتربين .. ومتخارجين ... بلد مليانة بالأشغال وناس عاطلين ...
بلد لى روحه جيعَآآآنة وتدي اللحمة مصريين ....

بلد سايقاها بس بركات ... كرامات أولياء وصالحين ،،،، بلد متناقضة للآخر
بس محروسة بي يسن ...... بس محروسة بى يسن ..........

أبونورة - دبي